Pavlodar oblysynda qyzmettik kólikti jeke maqsatta paıdalanǵandar anyqtaldy
ASTANA. QazAqparat - Pavlodar oblysynda 2017 jyly mamyr aıynda júrgizilgen arnaıy reıd nátıjesinde qyzmettik kólikti jeke múdde úshin jáne jumystan tys ýaqytta paıdalanǵan sheneýnikter áshkere boldy.
Memlekettik qyzmet isteri jáne sybaılas jemqorlyqqa qarsy agenttigi Pavlodar oblysy boıynsha departamenti sybaılas jemqorlyqtyń aldyn alý basqarmasynyń basshysy Ardaq Balǵojınniń aıtýynsha, qyzmettik kólikte túnde nemese demalys kúnderi júrý boıynsha tórt fakti anyqtalǵan, dep habarlaıdy pavlodarnews.kz .
- Máselen, 6 mamyr kúni saǵat 01:15 Bekhojın kóshesinde «Pavlodar aýdany ákimdiginiń kommýnservıs» JShS-ne tıesili «Taıota» kóligi toqtatyldy, - deıdi ol. - Kólik ishinde júrgizýshiden basqa, taǵy da eki jolaýshy bolǵan. Kelesi kúni jeksenbide saǵat 18:40-ta Pavlodar-Semeı baǵytynda, ıAmyshev aýylynyń janynda Aqqý aýylyna bet alǵan «Lada» temir tulpary ustaldy. Kólik Lebıaji aýdany veterınarııa bólimine tıesili bolyp shyqty. Budan basqa, saǵat 11-de Jelezın aýyldyq aımaǵy ákimi apparatynyń Skoda Rapid avtokóligi aýdan ortalyǵyndaǵy «Mádı» dámhanasynyń janynda nazarǵa ilikken. Bul kóliktiń júrgizýshi bolmaýyna baılanysty qyzmettik kólik apparattyń bas mamanyna tirkelgeni belgili boldy. Er adam dámhanaǵa óndiristik jumys úshin dánekerleýshini ákelgenin aıtyp aqtalǵan bolsa, jazbasha bergen jaýabynda dámhana qasyna shınanyń qysymyn tekserýge toqtaǵanyn málim etken. Nátıjesinde reıdke qatysýshylar «Mádı» dámhanasy Jelezın aýyldyq okrýgi ákiminiń aǵasynyń ıeliginde ekenin anyqtaǵan. Sondyqtan tártip saqshylary mamannyń aýyzsha bergen jaýabyn durys dep tapty.
Tórtinshi fakti Pavlodar - Omby tas jolynda oryn alǵan. Polıtseıler manevr jasaý erejesin óreskel buzǵany úshin aýyl sharýashylyǵy jáne kásipkerlik bólimine tıesili «Lada» kóligin toqtatqan. Temir tulpardy bólim basshysy basqarǵan jáne onyń jol-sapar paraǵy bolmaǵan. Tártip saqshylary eki ákimshilik hattama toltyryp, júrgizýshige 10 AEK kóleminde aıyppul salyndy.
