Pavlodar oblysynda qyzdar mingen kólik qar qursaýynda qalǵan
PAVLODAR. QAZAQPARAT. – Sharbaqty aýdanynda polıtsııa qardyń astynda qalǵan avtokólikti shyǵaryp aldy, dep habarlaıdy QazAqparat tilshisi.
«13 aqpan kúni biz demalysty Shaldaı aýylynda qurbymyzdyń úıinde ótkizemiz dep sheshtik. Sonda bara jatqanda kólik joldan shyǵyp ketip, qarǵa turyp qaldyq. Kólikti omby qardan shyǵarý múmkin emes edi. Biz ózimiz tyryssaq ta, qolymyzdan eshteńe kelmedi. Osy kezde bizge qasymyzdan ótip bara jatqan polıtsııa qyzmetkerleri kómekke keldi. Kóligimizdi alyp shyqqan Qanat Isanov pen Arman Muqanovqa alǵys aıtamyz», - dep jazdy kólikte bolǵan qyzdar áleýmettik jelige.
Olardyń aıtýynsha, Sharbaqty aýdanynyń polıtseıleri olarǵa qıyn sátte qol ushyn sozǵan. Aýdandyq polıtsııa bólim bastyǵynyń orynbasary Arman Muqanov ýchaskelik ınspektor Qanat Isanovpen birge trassany «Taksı» jedel-aldyn alý sharasy barysynda torýyldap júrgen.
«Bir kóliktiń joldan shyǵyp ketkendigin baıqadyq. Jaqyndaǵan kezde kólikti shyǵara almaı jatqan qyzdardy kórdik. Qar qursaýynda qalǵan kólikti arqan arqyly óz kóligimizge tirkep, jolǵa shyǵardyq», - dedi A. Muqanov.
