Pavlodar oblysynda «kúıdirgi» degen dıagnozben 5 naýqas tirkeldi
ASTANA. Maýsymnyń 21-i. QazAqparat /Ernur Aqanbaı/ - Aǵymdaǵy jylǵy maýsymnyń 19-20 aralyǵynda Pavlodar oblysynyń Aqsý aýdanynyń Qarakól jáne Rebrovka aýyldarynda «kúıdirgi» degen dıagnozben 5 naýqas tirkelgendigi belgili boldy.
Bul týraly QazAqparatqa QR Densaýlyq saqtaý mınıstrliginiń Memlekettik sanıtarlyq-epıdemıologııalyq qadaǵalaý komıteti habarlady.
«Birinshi naýqas aǵymdaǵy jylǵy 19 maýsymda anyqtalǵan jáne aýyr kúıinde Pavlodar qalalyq ınfektsııalyq aýrýhanasyna jatqyzylǵan. Júrgizilgen emge qaramastan naýqas aǵymdaǵy jyldyń 20 maýsymynda qaıtys bolǵan. Medıtsına qyzmetkerleri úılerdiń aýla ishindegi tekserýlerdi belsendi júrgizý barysynda kúıdirgi aýrýyna kúdikti taǵy tórt naýqasty anyqtady jáne olardy aýrýhanaǵa jatqyzdy. Eki naýqastan, onyń ishinde qaıtys bolǵan bir adamnan alynǵan materıaldy zerthanalyq zertteý kezinde kúıdirgi aýrýynyń qozdyrǵyshy anyqtaldy. Qalǵan úsh naýqastan jáne syrtqy orta obektilerinen alynǵan materıalmen jumys júrgizilýde», delingen búgingi taratylǵan habarlamada.
Densaýlyq saqtaý mınıstrligi baspasóz qyzmetiniń málimetinshe, epıdemıologııalyq tekserý barysynda naýqastar aǵymdaǵy jyldyń 11 maýsymynda aldyn ala veterınarııalyq kýálandyrýy joq iri qara maldy soıý jaǵdaıyna qatysqandyǵy anyqtaldy.Oshaqtarda baılanysta bolǵan 80 adam anyqtaldy, olardyń barlyǵy profılaktıkalyq em qabyldaýda.Veterınarııalyq qyzmetpen birlesip tekserý júrgizý kezinde joǵaryda kórsetilgen kezeńde 5 bas iri qara mal jáne bir jylqy ólgendigi anyqtaldy.
«Oshaqtarda dezınfektsııalyq is-sharalar júrgizildi.Kúıdirgi aýrýy boıynsha statsıonarly qolaısyz pýnktterdiń kadastrasyna sáıkes aýylsharýashylyq maly arasyndaǵy aýrýlardyń sońǵy jaǵdaıy kórsetilgen eldi mekenderde 1967 jyly tirkelgen.Pavlodar oblysynyń halqy arasynda kúıdirgi aýrýynyń sońǵy jaǵdaıy 1985 jyly tirkelgen. Komıtettiń, «Sanıtarııalyq-epıdemıologııalyq saraptama jáne monıtorıng ǵylymı ortalyǵy» RMQK-nyń jáne «Masǵut Aıqymbaev atyndaǵy Qazaq karantındik jáne zoonozdyq juqpalar ǵylymı ortalyǵy» RMQK-nyń mamandarynyń qatysýymen oshaqtarda epıdemııaǵa qarsy jáne veterınarııalyq-sanıtarııalyq is-sharalar jalǵasýda», delingen taratylǵan habarlamady.
