Pavlodar oblysynda qutyrý aýrýynyń alǵashqy deregi anyqtaldy
PAVLODAR. QazAqparat - Pavlodar oblysynda bıyl qutyrý aýrýynyń alǵashqy deregi tirkelgen. Bul týraly óńirlik kommýnıkatsııalar qyzmetinde ótken brıfıngte QR AShM veterınarlyq baqylaý jáne qadaǵalaý komıteti Pavlodar oblystyq aýmaqtyq ınspektsııasynyń basshysy Rashıt Nurbekov málim etti, dep habarlaıdy pavlodarnews.kz.
«Epızootıkaǵa qarsy is-sharalardyń júrgizilýine baılanysty qutyrý aýrýynyń taralý oshaqtary sońǵy bes jylda azaıyp keledi. Dese de, bıyl oblysymyzda qutyrý aýrýyn juqtyrýdyń bir oqıǵasy tirkeldi. Bul Kachır aýdany Voskresensk aýyldyq okrýginiń Malye Bereznıkı aýylynda túlkimen baılanysta bolǵan ıtten tabyldy», - dedi Rashıt Nurbekov.
Onyń aıtýynsha, bıyl veterınarlyq aldyn alý sharalarynyń josparyna sáıkes segiz asa qaýipti aýrýǵa qarsy úsh mıllıonǵa jýyq shara ótkiziledi. - Kúıdirgige qarsy vaktsınatsııalaý jumystary úı janýarlarynyń barlyq túrin qamtıdy, - dedi Rashıt Nurbekov. - Al emfızematozdy karbýnkýlǵa qarsy vaktsınalaý osy aýrýǵa beıim janýarlarǵa jasalsa, joǵary patogendi tumaýǵa qarsy shara úı qustarynyń barlyq túrine júrgiziledi. Іs-sharalar respýblıkalyq bıýdjet esebinen júzege asyrylady. Bul maqsatta 627 mıllıon teńge qarastyrylǵan. Jalpy, 2018 jyly 28 asa qaýipti ınfektsııa boıynsha dıagnostıkalyq zertteý ótkiziledi. Ókinishke oraı, úı janýarlarynyń arasynda brýtsellez aýrýy keń taralǵan».
Aıta keterligi, bıyl brýtsellezdi anyqtaý maqsatynda 550 myń iri qara mal men 860 myń usaq qara maldyń qan sarysýy zertteledi. Búgingi kúni tekserilgen 160 myń bas maldyń 1475-inde brýtsellez belgileri anyqtaldy.
