Pavlodar oblysynda qusy qyrylǵan turǵyndarǵa 83,2 mln teńge tólenedi
Bul týraly óńirlik kommýnıkatsııalar qyzmetinde ótken baspasóz máslıhatynda QR AShM Veterınarlyq baqylaý jáne qadaǵalaý komıtetiniń Pavlodar oblystyq aýmaqtyq ınspektsııasynyń basshysy Rashıd Nurbekov málim etti.
- Oblysymyzda 5 aýdannyń 7 aýylynda joǵary patogendi qus tumaýy anyqtaldy. Karantındik sharalar júrgizilýde. 126 367 qus ıelerinen alynyp, joıyldy. 3163 bas qus óldi. Óńirimizge 503 myń doza vaktsına jetkizildi. 400 myń bastan astam qus egildi. Búginde epızootııalyq jaǵdaı turaqty, - dedi Rashıd Nurbekov.
Pavlodar oblysynda qus tumaýy Aqtoǵaı jáne Baıanaýyl aýylynda, Tereńkól aýdanynda Jańaqurylys aýyly, Ertis aýdanynda – Aǵashoryn, Jelezın aýdanynda Aqtaý, Jańajuldyz, Ozernoe aýyldarynda tirkeldi.
Rashıd Nurbekovtyń aıtýynsha, statıstıka komıtetiniń resmı saıtynda qustardyń baǵasy bekitilgen. Qaz – 6500 tg, úırek – 3516 tg, taýyq – 1187,5 tg, kúrketaýyq – 5000 tg bolyp baǵalanǵan.
- Qazirgi ýaqytta tólem jasaý úshin qujat jınaý júrgizilýde. Tolyq qujat Ertis, Tereńkól, Jelezın aýdandarynda daıyn. Turǵyndar joıylǵan qustary tirkelgen sharýashylyq kitapshasynyń kóshirmesin, derbes shottaryn tapsyrýy tıis. Qujattar elordadaǵy bas keńsege jetkennen keıin 2-3 kún ishinde qarjy jiberiledi. Bizdiń oblys osy aptada tólemderdi ala bastaıdy dep oılaımyn. Esep boıynsha oblysymyzda joıylǵan qustar úshin 83,2 mıllıon teńge tólenedi, - dedi Rashıd Nurbekov.
Pavlodar oblysy aýyl sharýashylyǵynyń basqarmasy basshysynyń orynbasary Marat Apsalyqovtyń sózine qaraǵanda, óńirde sońǵy qus ólimi 28 qyrkúıek kúni tirkelgen. Vatsınalardy egý aldymen shekaradaǵy aýdandardan bastaldy, búginde sońǵy eki aýdan qalǵan.
