Pavlodar oblysynda kúshti jel shatyrlardy julyp, elektr jelilerin zaqymdady
«Sekýndyna 27 metrge jetetin ekpindi jel saldarynan («Qazgıdromet» RMK málimeti boıynsha) eki eldi mekende shatyrlar julyndy», - dep habarlady tilshilerge Pavlodar oblysy tótenshe jaǵdaılar departamentiniń baspasóz qyzmetinen.
Qatty jel saldarynan 8 naýryz kúni saǵat 04:15-te Baıanaýyl aýdany, Jańatilek aýylynda B.Haıdarov atyndaǵy orta mekteptiń úsh qabatty ǵımaratynyń shatyrynan aýdany 51 sharshy metr pishindi qańyltyr julyndy. Zardap shekkender joq.
Ekinshi oqıǵa búgin, saǵat 06:30-da Pavlodar qalasynda, Kataev kóshesi, 18-mekenjaıynda bolǵan. Ekpini sekýndyna 20 metrge jetetin qatty jel saldarynan 4 qabatty keńseniń shatyryndaǵy qańyltyr julynyp ketken. Onyń aýdany 1440 sharshy metrdi quraıdy. Ǵımarat 1980 jyly salynǵan, onyń sońǵy jóndeý jumystary 2022 jyly júrgizilip, áli aıaqtalmaǵan. Qurbandar men zardap shekkender joq.
«Eki aýdanda tótenshe jaǵdaıda elektr qýaty úzildi. Atap ótkende, Maı aýdanynda bes eldi meken: Baskól, Keńtúbek, Maıtúbek, Aqjar jáne ishinara Kóktóbe aýyly jaryqsyz qaldy. Abonentter sany naqtylanýda. Apat saldarymen kúreske «Mamyr» óńirlik elektr jelisiniń 12 qyzmetkeri men 3 tehnıka jumyldyrylǵan. Al Aqqýly aýdanynda 16 eldi mekende: Besqaraǵaı, Jambyl, Jańatan, Áıteı, Sharbaqty, Tósaǵash, Jabaǵyly, Qazy, Malybaı, Qazantaı, Maıqaraǵaı Merǵalym, Shaqa, Shoqtal, ishinara Aqqýly, ıAmyshevo aýyldary jaryqsyz qaldy. Apat saldarymen kúreske aýdandyq elektr jelisiniń 10 qyzmetkeri men 2 tehnıka jumyldyryldy», - dep qosyp ótti oblystyq TJ departamentinen.
Anton Gagarın