Pavlodar oblysynda kúshti jel mektep pen qazandyqtyń shatyryn julyp túsirdi

PAVLODAR. QazAqparat – Eki oqıǵa da Ekibastuz mańynda boldy, dep habarlaıdy QazAqparattyń menshikti tilshisi.

«19 maýsymda sekýndyna 17 metr jyldamdyqpen soqqan kúshti jel saldarynan birneshe nysannyń shatyry ushty», - dep habarlady Pavlodar oblystyq Tótenshe jaǵdaılar departamentiniń baspasóz qyzmeti.

TJD aqparaty boıynsha, eki oqıǵa da Ekibastuz qalasy mańyndaǵy Bozshakól aýylynda bolǵan.

«Bozshakól orta mektebi men aýmaǵy 100 sharshy metr ortalyqtandyrylǵan qazandyqtyń shatyry julyndy. Eshkim zardap shekken joq», - dep naqtylady mekeme.

Keshe jel osy Bozshakól aýylyndaǵy tasjoldy jaryq qylyp turǵan baǵandardy qulatqanyn eske sala keteıik.

Anton Gagarın