Pavlodar oblysynda quramynda radon bar shıpaly kólder anyqtalýda
ASTANA. QazAqparat - Pavlodar oblysynda týrızm salasy úshin radon kózderin paıdalaný kózdelip otyr, dep habarlaıdy pavlodarnews.kz. Bul týraly oblystyq ákimdikte ótken keńeıtilgen apparattyq jıynda óńirlik kásipkerlik, saýda jáne týrızm basqarmasynyń basshysy Dastan Ryspekov málim etti.
- Týrızm salasy úshin serpin beretin tyń jobalardyń biri - radon kózderi, - deıdi Dastan Ryspekov. - Almaty oblysy Uıǵyr aýdanynyń Shonjy kentinde ornalasqan radon kózderiniń analogy boıynsha mıneraldy sýdy paıdalaný adam aǵzasyna oń áser etedi. Osy joba aıasynda qalalar men aýdandardyń ákimdikterine ystyq kózderdiń bar-joǵyn anyqtaý boıynsha hat joldanǵan. Nátıjesinde Jelezın aýdanynyń Mıhaılovsk aýylyndaǵy Chaldýk kólinde jáne Ýspen aýdanynyń Temırıazevo aýylynda bar bolyp shyqty.
Basqarma basshysy Jelezın aýdanynda ózdiginen aǵyp jatqan uńǵyma aýdannyń Ádilet basqarmasynda 2018 jyly 31 jeltoqsanda ıesiz retinde tirkelgenin atap ótti.
- Bul kól geografııalyq kartada kórsetilmegen, - deıdi Dastan Ryspekov. - Bir jyl ótkennen keıin menshik ıesi joq dep taný úshin qujattar sotqa jiberiledi. Bul kózder emdik-saýyqtyrý týrızmi úshin jańa baǵyt bolady. Osy baǵytta oryndy anyqtaý, kóldiń temperatýrasy men emdik qasıeti týraly aqparat jınaý, zertteý júrgizý boıynsha jumys josparlanyp otyr.
Aıta keterligi, jer qoınaýynan 37 gradýs bolyp shyǵatyn sýdyń adam aǵzasyna berer paıdasy mol. Túrli bórtpeler men qyshyma aýrýlarǵa, býyn, sozylmaly, qan qysymynyń kóterilýin emdeıdi.
