Pavlodar oblysynda kúnine 200 adam tumaý jáne pnevmonııamen aýrýhanaǵa túsedi
PAVLODAR. QazAqparat - Qazirgi ýaqytta óńirdegi ýaqytsha oryndarda 1231 naýqas jatyr, dep habarlaıdy QazAqparat pavlodarnews.kz resýrsyna silteme jasap.
Bul týraly onlaın baspasóz jıynynda oblystyq densaýlyq saqtaý basqarmasy basshysynyń mindetin atqarýshy Birjan Dosmaılov málim etti.
«Búginde oblysymyzdaǵy ınfektsııalyq statsıonarlarda COVID-19 anyqtalǵan 209 adam jatyr, - dedi Birjan Dosmaılov. – Onyń 5-i – bala. 21 adamnyń jaǵdaıy aýyr. 5 adam ókpeni jasandy jeldetý apparatyna qosylǵan. Óte aýyr jaǵdaıda 2 adam bar. 130 adamnyń jaǵdaıy ortasha bolsa, 58 adam qanaǵattanarlyq jaǵdaıda».
Birjan Dosmaılovtyń aıtýynsha, ýaqytsha qaraý oryndarynda JRVI jáne pnevmonııaǵa shaldyqqan 1231 adam bar. Keshegi kúnniń ózinde 221 adam túsken. 1231 adamnyń 26-sy – bala. 74 naýqas aýyr jaǵdaıda, 36 adam ókpeni jasandy jeldetý apparatynda jatyr.
Búginde oblystaǵy ınfektsııalyq statsıonarlardaǵy oryndar 80,4 paıyzǵa, ýaqytsha qaraý oryndary 99 paıyzǵa tolǵan. Qosymsha oryn daıyndaý jáne jaǵdaıy jaqsarǵandardy shyǵarý máselesi qarastyrylýda.
«Qazir óńirimizde kúnine 200 adam aýrýhanaǵa túsýde, - dedi Birjan Dosmaılov. – Sondyqtan turǵyndardy barynsha sanıtarlyq talaptardy, áleýmettik araqashyqtyqty saqtaýyn suraımyz. Qazirgi kezde dárigerlerge óte aýyr júk túsip otyr. Ózimizdiń de, jaqyndarymyzdyń da densaýlyǵyn saqtaý úshin muqııat bolaıyq. Ókinishke qaraı, aýrý anyqtalǵan kez kelgen adamdy aýrýhanaǵa qabyldaı almaımyz. Oryn tapshylyǵynan tek aýyr jaǵdaıdaǵy adamdardy jatqyzýǵa májbúrmiz».
Basqarma basshysy dári tapshylyǵyn da atap ótip, turǵyndar ózin-ózi emdeýmen aınalyspaýy kerektigin aıtty.
«Jedel járdem almasa, aýrýhana qabyldamasa adamdarda baıbalam bastalyp, ózin-ózi emdeýge kóshedi. Olaı áreket etpeý kerek. Aýrýdyń belgisi shyqsa dárigerler mindetti túrde qarap, emdeý sharalaryn taǵaıyndaıdy. Suraq týyndasa, kez kelgen aýrýhananyń baılanys ortalyǵy táýlik boıy jumys jasaıdy. Qosymsha 109 nemese 103 nómirine habarlasýǵa bolady. Ókinishke qaraı, naýqastar óte kóp túskendikten dárimen qamtamasyz etý jospardaǵydan kóp mólsherde júrýde. Sondyqtan jetkizýshiler de ýaqytynda úlgermeı jatyr. Saldarynan dárihanalarda da dári tapshylyǵy baıqalýda» dep eskertti Birjan Dosmaılov.
