Pavlodar oblysynda kózine qan tolǵan azamat polıtseıdi baltamen urdy
PAVLODAR. QazAqparat - Shaqyrtýmen kelgen polıtsııanyń ýchaskelik ınspektoryn baltamen urǵan. Alaıda polıtseıler shydamdylyq tanytyp, shabýyldaýshyny polıtsııa bólimshesine jetkizdi, dep habarlaıdy «QazAqparat» HAA tilshisi.
Pavlodar oblystyq ІІD baspasóz qyzmeti habarlaǵandaı, Jelezınsk aýdany jergilikti polıtsııa qyzmetiniń ýchaskelik ınspektory Serik Sarymovtyń uıaly telefonyna Jańa juldyz aýylynyń kámeletke tolmaǵan turǵyny úıinde bolyp jatqan urys týraly habarlap, kómek suraǵan.
Shaqyrtýǵa kelgen polıtsııanyń ýchaskelik ınspektory úıde eregisip jatqan eki er kisini kóredi. Polıtseı psıhologııalyq bilimin qoldana otyryp, órshikken janjaldy sózben toqtatpaq bolady. Alaıda 53 jasar úı ıesi - balta alyp, polıtsııa qyzmetkeri men otbasy múshelerin óltiretindigin aıtyp, qorqytady. Quqyq buzýshylyq árekettiń aldyn alý maqsatynda ýchaskelik ınspektor qyzmettik kóligindegi arnaıy quraldardy qoldanbaq bolady. Onyń artynan ashýǵa býlyqqan úı ıesi ere shyǵyp, mashınanyń júrgizýshi otyratyn esiginiń terezesin baltamen uryp, ekinshi soqqyny polıtseıdiń sol jaq ıyǵyna jasaıdy.
S.Sarymov jaraqatyna qaramastan, sambo ádisterin qoldanyp, buzaqyny polıtsııa bólimshesine jetkizedi.
Buryn qylmystyq jaýapkershilikke tartylǵan kúdiktige qatysty tek otbasylyq-turmystyq janjal úshin emes, sonymen qatar QR QK 380-babynyń 1-tarmaǵynda kórsetilgendeı, bılik ókilderine qatysty kúsh qoldanǵany úshin qylmystyq is rásimdeldi.
