Pavlodar oblysynda kóship ketken jastardy qaıtarý kózdelip otyr

PAVLODAR. QazAqparat - Patriot.kz jobasy kezinde oqýǵa ketip, elimizdiń basqa óńirleri men shetelde turaqtap qalǵan jastardy qaıtarý kózdelýde, dep habarlaıdy pavlodarnews.kz.

Oblystyq jastar saıasaty isteri jónindegi basqarma basshysy Rýslan Tileýlesov oblys ákiminiń orynbasary Meıram Begentaevtyń tóraǵalyǵymen ótken «Rýhanı jańǵyrý» baǵdarlamasyn júzege asyrý jónindegi óńirlik saraptaý tobynyń otyrysynda Jastar jyly aıasynda atqarylatyn jumystardy sanamalap ótti. - Jastar jylyna oraı basqarma uıymdastyrylatyn is-sharalardyń jol kartasyn ázirledi, - deıdi Rýslan Tileýlesov. - Jyl saıyn ótkiziletin sharalarǵa bıyl 10 iri jobany qostyq. Olardyń arasynda «Elime qyzmet» volonterlik qyzmet baǵyty týraly erekshe aıtqym keledi. Ony biz Ulybrıtanııa premer-mınıstri Tonı Bler tájirıbesinen aldyq. Jastardyń mamandyq tańdaýyna kómektesetin bul joba kezinde Anglııada tıimdiligin kórsetken edi.

Óńirlik jastar saıasaty isteri jónindegi basqarmasy Jastar jyly aıasynda Patriot.kz atty taǵy bir tyń jobany usyndy. Rýslan Tileýlesovtiń aıtýynsha, joba boıynsha ár ýaqytta bilim alý úshin elimizdiń túrli aımaqtary men shetelge kóship, sol jaqta qalyp qoıǵan jastardy oblysqa qaıtarý boıynsha jumys júrgiziledi. Jalpy, Jastar jyly aıasyndaǵy is-sharalar óskeleń urpaqtyń jumyspen qamtylýyna baǵyttalady.

Oblys ákiminiń orynbasary Meıram Begentaev óńir basshysy Bolat Baqaýovtyń jastarǵa aǵash egý boıynsha bergen tapsyrmasyn oryndaý qajettiligin eskertip, bul jumysty tez arada qolǵa alýdy tapsyrdy. - Jyl saıyn jasyl jelekti otyrǵyzamyz, bastysy olardyń saqtalyp, ósip-ónýin qadaǵalaýymyz kerek, - dedi Meıram Begentaev. - Qalalar men aýdandar boıynsha qansha tal egýimiz kerek, olardy qaıda jáne qashan otyrǵyzýymyzdy anyqtaý kerek. Bul jumysty qazirden bastaý mańyzdy.