Pavlodar oblysynda qos mereke qarsańynda 27 nysan iske qosylady
«Oblystyń qalalary men aýdandarynda aýylsharýashylyq jármeńkeleri, mádenı-sporttyq is-sharalar ótkiziledi. 1 jeltoqsan kúni Pavlodar, Aqsý jáne Ekibastuz qalalarynda qoǵamdyq kólikterde júrý tegin bolmaq. Sonymen qatar mereke kúnderi oblys turǵyndary úshin túrli taýarlar men qyzmetterge kınoteatrlarda jáne saýda ortalyqtarynda jeńildikter qarastyrylady», - dedi Ernur Dáýenov.
Mereke qarsańynda ashylatyn nysandardyń qatarynda oblys ortalyǵyndaǵy olımpıadalyq rezervtiń 50 metrlik júzý basseıni, Aqtoǵaı aýdanynyń Qaraoba aýylyndaǵy eki páterli jańa úı, Jelezın aýdanynyń Aqtaý aýylyndaǵy Mádenıet úıi, «Azamattar alıansy» úkimettik emes uıymynyń ǵımaraty, Tereńkól aýdanynda «Kýznetsov» jeke kásipkerliginiń saýda úıi, Maı aýdanyndaǵy Abylaıtas eskertkishi bar.
Budan bólek, Aqtoǵaı aýyly Abaı atyndaǵy mektepte jáne Qojamjar aýyldyq okrýginiń Tilenshın orta mektebinde, Qońyrózek aýyldyq okrýginiń Pavlovsk orta mektebinde, Ýspen aýdanynyń Ravnopol aýyldyq okrýginiń Konstantınovskıı orta mektebinde «Rýhanı jańǵyrý» kabınetteri men Ýspen aýdanynyń № 3 orta mektebinde «Muǵalimder keńsesiniń» tusaýy kesiledi.
Ekibastuz qalasy Solnechnyı kentinde qaıta jóndeýden ótken turǵyn úı, Pavlodardyń «Saryarqa» shaǵyn aýdanynda toǵyz qabatty № 21 jáne № 22 turǵyn úıler qoldanysqa beriledi. Pavlodar qalasynyń Jańaaýyl aýylynda jańa klýb, Sharbaqty aýdanynyń «Radýga» mektepten tys jumys ortalyǵynyń bazasynda IT-ortalyq ashylady.
Táýelsizdik kúnine oraı Ekibastuzda temirjol dóńgelekterin shyǵarý kesheni, tórt turǵyn úı, «Dýman» saýda úıi, jekemenshik balabaqsha men jol boıyndaǵy servıs - 50 oryndyq dámhana paıdalanýǵa tapsyrylady. Pavlodardaǵy «Saryarqa» shaǵyn aýdanynda eki qabatty turǵyn úı men Tereńkól aýdany Bobrovskıı aýyldyq okrýginiń Jańabet aýylynda bos ýaqytty tıimdi ótkizý ortalyǵy ashylady.
Foto: Olga Býgaeva
