Pavlodar oblysynda «Kórpe Fest» etnofestıvaline qatysýshylar úshin onlaın daýys berý bastaldy
Aımaqtaǵy onlaın baıqaýǵa 5-70 jas aralyǵyndaǵy 211 adam tirkelgen, onyń 50-i bala. Baıqaýǵa qyzyǵýshylyq tanytyp, sheberlik sabaqtaryna qatysyp jatqandardyń jalpy sany 400-ge jýyqtady.
Óńirde qolóner festıvali 2020 jyldyń 23 qarashasynda onlaın formatta bastalǵan bolatyn. Qatysýshylar eki aıdan astam ýaqyt boıy kásibı sheberlik sabaqtaryn tegin alyp, ózara tájirıbe almasýǵa múmkindik aldy.
«Kórpe Fest» mega etnofestıvaliniń negizin qalaýshy Yrza Tursynzadanyń aıtýynsha, bul – salt-dástúrdi kásipke aınaldyryp, násibin tabamyn degen názik jandylar úshin pandemııa kezinde jasalǵan aýqymdy qoldaý.
«Karantın kezinde jumyssyz qalyp, nápáqasynan aırylǵan adamdar kóp. Osy kezde birinshi maqsat – olardy barynsha demeý, ekinshi maqsat – úıdiń uıytqysy ǵana emes, elge úlgi bolatyn qyryq jandy qazaq áıeliniń bolmysyn jańǵyrtý. Qazaq barda bul kásip – máńgilik», - deıdi belgili etnodızaıner Yrza Tursynzada.
Sonymen qatar, ol pavlodarlyq názik jandylardyń saltqa beriktigin ańǵarǵandyǵyn atap ótti.
«Bári Pavlodar oblysynda ulttyq baıqaý ótkizý qıyn bolady degen bolatyn. Alaıda, pavlodarlyq áıelder bárinen ozdy. Óıtkeni, salt-dástúrdi jaqsy saqtaǵan», - deıdi ol.
«Kórpe Fest» festıvali Pavlodar aımaǵynda alǵash ret uıymdastyrylyp otyr.
«Osy sharany oılap tapqan Yrza apamyz ben onyń bastamasyn qoldaǵan oblys ákimine alǵysymyz sheksiz. Sebebi, biz óńirde ulttyq qolónerge qyzyǵýshylyǵy bar áıelderdiń osynsha kóp bolatynyn bilmeppiz. Osy konkýrs arqyly biz basymyzdy biriktirip úlken bir «otbasyna» aınaldyq»,-deıdi Ýásılá Nurmuhanbetova.
Aıta keteıik, baıqaý tómendegi bes nomınatsııa boıynsha jarııalandy.
- « Sheberdiń ınesi de – altyn, kúımesi de – altyn!» Qazaqy naqyshtaǵy ınterer úlgisi
- «Kórpe vernısajy» (4 kórpe, 4 jastyq)
- «Ulttyq syı káde» onlaın sheberlik sabaqtar nátıjesinde jasalǵan buıymdar
- «Atanyń kásibi – balanyń násibi» 5 jastan 16 jasqa deıingi bolashaq sheberler baıqaýy.
Baıqaý sońynda barlyq qatysýshylarǵa jalpy sertıfıkattar beriledi. Al, jeńimpazdarǵa Yrza Tursynzadanyń jeke kásibı sheberlik kýrsynan ótkeni týraly arnaıy sertıfıkat, turmystyq jáne óndiristik tigin mashınalary, sonymen qatar avtorlyq dızaınmen kómkerilgen 25 metrlik shapanǵa arnalǵan kezdemeler tabystalady.
Pavlodar óńirindegi «Kórpe Fest» mega etnofestıvaliniń qorytyndysy 22 naýryzda ótetin saltanatty sharada jarııalanady.