Pavlodar oblysynda koronavırýsqa qarsy vaktsınatsııa qarqyny 1,6 ese ósti

PAVLODAR. QazAqparat - Óńirde vaktsınatsııa naýqanynyń qalaı júrip jatqandyǵy COVID-19 vırýsyna qarsy kúres jedel shtabynyń otyrysy barysynda talqylandy, dep habarlaıdy QazAqparat.

Densaýlyq saqtaý basqarmasynyń basshysy Aıdar Sıtkazınov Pavlodar oblysynda 155 myń turǵyn koronavırýs vaktsınasynyń birinshi komponentin alyp úlgergenin jáne 86 myńnan astam adamnyń tolyq egilgenin aıtty.

- 28 maýsym men 4 shilde aralyǵynda vaktsınatsııa jyldamdyǵynyń 1,6 esege óskeni belgilendi, - dedi bólim basshysy. - Bir apta buryn vaktsınatsııanyń birinshi komponenti 17 myńnan sál astam adamǵa egilse, sońǵy jeti kúnde 29 myńdaı adam qabyldaǵan. Oblysta vaktsınany medıtsına mamandary, muǵalimder jáne quqyq qorǵaý organdarynyń qyzmetkerleri belsendi túrde qabyldap jatyr.

Uıymdasqan eńbek ujymdary úshin Pavlodar oblysynda 67 mobıldi top jumys isteıdi.

- Rastalǵan koronavırýs ınfektsııasy bar naýqastar kún saıyn artyp keledi. Onyń sany qazirdiń ózinde júzden asty, - dedi oblys ákimi Ábilqaıyr Sqaqov. - Qazir vırýs óte tez paıda bolyp, jyldam asqynady. Kópshilikke yntalandyrý sharalaryn qoldana otyryp, vaktsınatsııanyń qajettiligin jetkizý qajet. Biz vaktsınatsııanyń jyldamdyǵyn apta saıyn taldaımyz. Ujymdyq ımmýnıtet paıda bolý úshin bul kórsetkish únemi ósip otyrýy tıis.

Ákimniń aıtýynsha, jergilikti basshylar men kásipkerlik qyzmetke jaýapty memlekettik qyzmetshiler qyzmet kórsetýshiler arasyndaǵy vaktsınatsııaǵa kóńil bólýi kerek.

Qazaqstannyń bas memlekettik sanıtar dárigeriniń jarlyǵyna sáıkes, bul sala ókilderi koronavırýs vaktsınasynyń birinshi komponentin 15 shildege deıin, al ekinshi komponentin 15 tamyzǵa deıin alýy tıis.

Aımaq basshysy bolashaqta shaǵyn jáne orta kásipkerler aıyppul tóleýshiler tizimine enip ketpes úshin aldyn alý sharalaryn qabyldaýdy tapsyrdy.