Pavlodar oblysynda kópir ótkelindegi jol apatynan 4 adam zardap shekti
PAVLODAR. QazAqparat – Pavlodar oblysynda kópir ótkelinde jol apaty bolyp, 4 adam zardap shekti, dep habarlaıdy QazAqparat Pavlodarnews.kz saıtyna silteme jasap.
Oqıǵa 28 shilde kúni Aqsý qalasyna baratyn baǵyttaǵy kópir ótkelinde bolǵan.
Oblystyq jedel járdem stantsııasynyń málimetinshe, jol apaty týraly habarlama saǵat 22.38-de túsken. Avtokólikterdiń soqtyǵysýy saldarynan 4 adam zardap shekken. «43 jastaǵy áıel men 67 jastaǵy er adam túrli jaraqattarmen jáne synyqtarmen № 1 Pavlodar qalalyq aýrýhanasyna jetkizildi. 32 jastaǵy áıel men 71 jastaǵy er adam aýrýhanaǵa jatýdan bas tartty», - dedi stantsııada.
Oblystyq Densaýlyq saqtaý basqarmasynyń aqparatyna sáıkes, 43 jastaǵy áıelde jabyq bassúıek-mı jaraqaty, ish qýysynyń jaraqaty, synyqtar, úshinshi dárejedegi travmatıkalyq shok tirkeldi. Jaǵdaıy aýyr dep baǵalanýda, jansaqtaý bóliminde ókpeni jasandy jeldetý apparatyna qosylǵan.
67 jastaǵy er adamda da jabyq bassúıek-mı jaraqaty, mıynyń shaıqalýy men túrli jaraqattar anyqtaldy. Neırohırýrgııa bólimine ornalastyrylǵan. Jaǵdaıy ortasha aýyr.
Foto: Konstantın Shelkov
