Pavlodar oblysynda kólikterdi arnaıy mobıldik beketter baqylaıtyn boldy
PAVLODAR. QazAqparat - Pavlodar oblysynda kólikterdi tekserýge arnalǵan jańa mobıldik beketter qoıyldy, dep habarlaıdy QazAqparat tilshisi óńir ákiminiń baspasóz qyzmetine silteme jasap.
Inspektorlar júk kólikteri kóp júretin joldarda jumys jasaıtyn bolady. Kólikter bólimshege jiberilmes buryn Pavlodar oblysynyń ákimine tanystyryldy. Óńir basshysynyń bastamasymen úsh arnaıy kólik satyp alyndy. Mercedes-Benz markaly avtokólikteri kóliktik baqylaý qyzmetkerleri júk kóliginiń júkti shamadan tys tasymaldamaýyn shuǵyl tekserý úshin arnaıy jasaqtalǵan. Jyljymaly tarazylar bir júk kóligin eki-úsh mınýttan artyq teksermeýge múmkindik beredi.
«Qyzmetkerlerimiz júktiń shamadan tys kóp ekenin anyqtıtyn bolsa, ákimshilik materıal taǵaıyndaıdy. Jeke tulǵalarǵa 50 AEK, zańdy tulǵalarǵa - 200 AEK-ge deıin aıyppul salynady», - dedi Pavlodar oblysy boıynsha Kóliktik baqylaý jónindegi ınspektsııa basshysy Serik Taldybaev.
«Alǵashqy kúni-aq mobıldik beketterde shamasynan tys júk tıegen kólikter anyqtaldy. Qalqaman kentine jaqyn jolda kýzovta 36 tonna beton tıegen Howo júk kóligi toqtatyldy. Al kóliktiń júk kótergishtigi - nebary 16 tonna. 20 tonnaǵa deıin júk tasymaldaǵany úshin kólik ıesine 430 myń teńgege deıin aıyppul salynýy múmkin», - dedi Pavlodar oblysy ákiminiń baspasóz qyzmetindegiler.
Pavlodar oblysy ákimi Bolat Baqaýovtyń aıtýynsha, óńirdegi jol tártibiniń saqtalýyn kóliktik baqylaý ınspektsııasy qyzmetkerlerimen birge jergilikti polıtsııa qyzmeti men kóliktik prokýratýra baqylaýy tıis.
