Pavlodar oblysynda kóligi buzylyp, dalada qalǵan júrgizýshi qutqaryldy
PAVLODAR. QazAqparat – Pavlodar obllysynda polıtsııa 52 jastaǵy júk kóliginiń júrgizýshisin qutqardy, dep habarlaıdy QazAqparat tilshisi.
«22 qańtar kúni kóligim buzylyp qaldy. Aýa raıynyń qolaısyzdyǵynan, jol kórinisiniń nasharlaýyna baılanysty tasjolda jalǵyz qaldym. Birde-bir kólik ne adam joq. Tamaq pen sý keshke taýsylyp qalǵan, janarmaı da bitýge shaq qaldy. Men munda qarda qalyp qalamyn dep oılap edim. Jol múldem kórinbeıdi» – dedi KamAz júrgizýshisi Ermek Kúzerbaev.
Pavlodar oblysynyń Polıtsııa departamentiniń ókilderi 52 jastaǵy Ermek Kúzerbaevtyń óziniń júk kóligimen Shymkent qalasynan Pavlodarǵa 21 qańtar kúni tańerteń shyqqanyn habarlady.
«24 qańtar kúni saǵat shamaen 14:00-de Pavlodar-Qyzylorda tasjolyn torýyldaý kezinde onyń Qaraǵandyǵa jetpeı 240-shy shaqyrymynda jol jıeginde turǵan KamAzdy baıqadyq, -dedi patrýldik polıtsııa rotasy qyzmetiniń aǵa ınspektory maıor Arman Ǵınaıatov.
«Biz áriptesim, aǵa serjant Tóleýtaı Qudaıbergenov ekeýmiz, kelip, terezesin qaqtyq. Ózin Shymkentten kele jatqan Ermek dep tanystyrǵan er adam shyǵyp, bizdi kórip máz bolyp qýanyp qaldy».
Polıtseılerge júrgizýshi onyń KamAzy eki kún buryn buzylyp, eki táýlikten beri tamaq ishpegenin aıtqan.
«Biz áriptesim ekeýmiz jaqyn jerdegi Stepnoı aýylyna baryp sý men tamaq alyp keldik. Kelip, ony tamaqtandyrǵan soń Shiderti aýylyna baryp, qajetti kólik bólshekterin satyp ákeldik», - dedi Tóleýtaı Qudaıbergenov.
«Kelip KamAzdy jóndedik. Ermek bizge alǵysyn aıtyp, ári qaraı jolǵa shyqty. Keıin habarlasqanymyzda, onyń mejelegen jerine jetkenin bildik».
