Pavlodar oblysynda kókónisterdiń baǵasy arzandady
NUR-SULTAN. QazAqparat – Qyrkúıekte Pavlodar oblysynda kókónisterdiń baǵasy 6 paıyzǵa tómendegen 05.10 2019 09:29 Ertis óńirinde qyrkúıek aıynda barlyq taýarlar men qyzmetterdiń baǵasy 0,3 paıyzǵa ósken, dep habarlaıdy pavlodarnews.kz.
Bul týraly oblystyq statıstıka departamenti málim etti.
«Pavlodar oblysy boıynsha 2019 jylǵy qyrkúıek aıynda tutyný baǵalarynyń ındeksi 100,3 paıyzdy, azyq-túlik taýarlaryna 100,1 paıyzdy, azyq-túlik emes taýarlarǵa 100,2 paıyzdy, aqyly qyzmetterge 100,7 paıyzdy qurady», - dedi departamentte.
Inflıatsııa deńgeıin sıpattaıtyn tutyný baǵasynyń ındeksi halyqtyń jeke tutyný úshin satyp alatyn taýarlary men qyzmetteri baǵasynyń ózgerýin kórsetedi. Baǵany tirkeý menshiktiń túrli nysandaryndaǵy saýda jáne qyzmet kórsetý salasy kásiporyndarynyń irikteme júıesi boıynsha barlyq oblys ortalyqtarynda, qalalar men aýdan ortalyqtarynyń belgilengen sheńberi boıynsha júrgiziledi. Qyrkúıek aıyndaǵy jaǵdaı boıynsha azyq-túlik taýarlary boıynsha jumyrtqaǵa – 6,2%, kúrishke – 2,9%, etke – 2,7%, kondıterlik ónimderge – 1,6% baǵa ósýi baıqaldy.
Sonymen qatar, kókónisterge 6,1 paıyzǵa baǵa tómendedi, - dedi departamentte. – Azyq-túlik emes taýarlar naryǵynda jıhaz jáne kilem ónimderine 1,5 paıyzǵa, farmatsevtıkalyq ónimderge 0,8 paıyzǵa baǵa ósýi tirkeldi. Aqyly qyzmetter boıynsha bilim berý qyzmetterine 1,6%, kólik qyzmetterine – 1,1% baǵa ósýi anyqtaldy.