Pavlodar oblysynda kıikterdiń sany 2 myńǵa jetti
PAVLODAR. QazAqparat - Pavlodar oblysy aýmaǵynda mekendeıtin kıikter men arqarlar sanynyń artýy baıqalýda. Bul týraly óńirlik kommýnıkatsııalar qyzmetinde ótken baspasóz máslıhatynda oblystyq orman sharýashylyǵy jáne janýarlar dúnıesi aýmaqtyq ınspektsııasynyń basshysy Qazbek Ámetov málim etti, dep habarlaıdy pavlodarnews.kz.
«2016 jyly aqbókender 10-15 bas qana kezdesken bolsa, qazirgi tańda olardyń sany 2000 basqa deıin jetken. Sonymen qatar arqarlardyń sany 2,1 paıyzǵa ósip, 700 basty qurap otyr»,- deıdi Qazbek Ámetov.
Bıyl qyrkúıek aıynda oblystyq aýmaqtyq ınspektsııa zoologııa ınstıtýty, «Ohotzooprom» mekemesimen birge Pavlodar oblysynyń rezervtik qoryndaǵy arqarlardy esepke alý boıynsha jumys júrgizdi. Nátıjesinde 204 bas arqar tizimge alyndy. Bul Ertis óńirinde janýarlar úshin jem-shóp qorynyń moldyǵy men alańsyz orta qalyptasqandyǵyn kórsetedi. Spıkerdiń aıtýynsha, 2017 jyldan bastap Baıanaýyl aýmaǵynda jumys isteıtin «Ohotzooprom» mekemesi tirek pýnktiniń qyzmetkerleri oblystyq orman sharýashylyǵy jáne janýarlar dúnıesi aýmaqtyq ınspektsııasy, Baıanaýyl ulttyq parkiniń memlekettik qyzmetkerlerimen birge Maı aýdanynda kıikter men arqarlardy kúzetedi. Sondyqtan bul janýarlardyń kóbeıýine tabıǵatty qorǵaý uıymdarynyń birlesken jumysy oń áserin tıgizgen bolý kerek.
