Pavlodar oblysynda qaı jerlerge blok beket qoıylatyny aıtyldy
PAVLODAR. QazAqparat – 1 sáýirden bastap Pavlodar oblysynyń shekaralaryna 9 blok beket qoıylady, dep habarlaıdy QazAqparat pavlodarnews.kz-ke silteme jasap.
Bul týraly óńirlik kommýnıkatsııalar qyzmetinde ótken baspasóz jıynynda Pavlolar oblysy polıtsııa departamentiniń basshysy Nurlan Másimov málim etti.
«Pavlodar oblysy aýmaǵynyń shekarasy boıynsha Shyǵys Qazaqstan oblysymen shektesetin Aqqýly aýdanynyń Sharbaqty aýylynda jáne Maı aýdanynyń Aqjar aýylynda, Aqmola oblysymen shektesetin Ekibastuz qalasyna qarasty Shiderti aýylynda, Qaraǵandy oblysymen shektesetin Baıanaýyl aýdanynyń Sátbaev aýylynda blokpost qoıylady. Bekette polıtsııa jáne dezınfektsııalyq qyzmet ornalastyrylady», - dedi Nurlan Másimov.
1 sáýirden bastap Pavlodar oblysynda kez kelgen kólik shekaralas oblystarǵa jáne shekaralas oblystardan óńirge jolaýshy tasymaldaýǵa tyıym salynady. Sondaı-aq dıplomatııalyq qyzmetterdi, emdelýge baratyn adamdardy, azyq-túlik jáne azyq-túlikke jatpaıtyn taýarlar tıelgen tranzıttik júk kólikterdi (epıdemııaǵa qarsy dezınfektsııalaýdy jáne saqtyq sharalaryn qatań qadaǵalaı otyryp) qospaǵanda, Qazaqstan Respýblıkasynyń basqa óńirleriniń turǵyndary men basqa memleketterdiń azamattarynyń kirýine tyıym salynady.
Departament basshysynyń aıtýynsha, óńir polıtseıleri tótenshe jaǵdaı kezinde kúsheıtilgen rejimde qyzmet atqarady.
