Pavlodar oblysynda qaı demalys orny men nysandarǵa barýǵa bolady
Pavlodar oblysyndaǵy keremet jerlerdiń biri – Baıanaýyl ulttyq tabıǵı parki. Munda taýlar men kólderdiń sulýlyǵyn tamashalap, tarıhı oryndarǵa saıahattaýǵa bolady. Ulttyq tabıǵı parktiń aýmaǵyna kirý úshin aqy tóleý kerek, ıaǵnı bir adamǵa 635 teńge.
Jazda osynda demalýǵa myńdaǵan adam keledi, sondyqtan baratyn demalys úılerimen aldyna ala kelisý kerek. Baıanaýylda demalý qymbatqa túsetini belgili, degenmen qaltaǵa salmaq túsirmeıtin oryndardy tabýǵa bolady. Keıbir demalys úılerine táýligine 4 myń teńgege toqtaý múmkindigi bar.
Sonymen qatar, jazǵy demalys maýsymy bastalǵan kezde ulttyq parktegi ortasha baǵa ósedi. Ádette, bir adamǵa 8-12 myń teńge bolsa, tamaqqa bólek aqy alynady. Budan bólek, kúnine 60 myńǵa tutas kottedjdi jalǵa alýǵa bolady.
Baıanaýyl kólderiniń ishindegi eń tanymaly – Jasybaı. Munda demalys úıleri kóbirek, jaǵajaılarda tıisti jaǵdaı jasalǵan jáne týrıstik baǵdarlar osy jerden bastalady.
Bul óńirde taý-tastardy tamashalap, Kempirtas pen Naızatasqa barýǵa, Baıanaýyl taýlarynyń eń bıigi Aqbet shyńyna shyǵýǵa bolady.
Qońyr Áýlıe úńgiri, Máshhúr Júsip kesenesi, Áýlıebulaq, Toraıǵyr kóliniń mańyndaǵy saq qorǵandary, Sultanmahmut Toraıǵyrov kesenesi, Musa Shormanov kesenesi sııaqty Baıanaýyl óńiriniń kıeli jerlerine týrıster kóptep aǵylady.
Aıta keteıik, osy óńirge saıahattap kelgender demalys úıleri men gıdti kóbine áleýmettik jelilerden, Instagram-nan nemese tanystarynyń usynysy boıynsha izdeıdi.
Baıanaýyldyń kórikti jerlerin tamashalaýdyń eń yńǵaıly jáne ońaı tásilderiniń biri - bir kúndik týrdy satyp alý. Bul rette týrıster úshin barlyǵy uıymdastyrylady, ıaǵnı jetkizetin kólikten bastap, baratyn marshrýt, tamaqtaný oryndary qamtylady.
Demalys kúnderi týrdy birneshe qazaqstandyq týrıstik fırmalar uıymdastyrady. Mundaı saıahat kezinde birden birneshe qyzyqty jerlerge barýǵa bolady. Pavlodardan transfert pen ekologııalyq tólemderdi esepke alǵanda, osyndaı fırmalardyń birinde týrdyń quny shamamen 11 myń teńgege jetedi.
Eki kúndik toptyq týr úshin 25 myń teńge tóleý kerek. Onyń aıasynda birneshe ekskýrsııa eskerilgen jáne Aqbet shyńyna shyǵý men qonaq úıde túneý múmkindigi jasalady.
Munymen qosa, keıbir kórikti jerlerge ózińiz jalǵyz bara alasyz. Pavlodardan Baıanaýyl aýylyna avtobýs qatynaıdy, bılet quny 2140 teńge shamasynda. Jolda júrý ýaqyty 3,5 saǵatty alady. Biraq munda jeke kólikpen nemese taksımen barǵan yńǵaıly. Taksıster 3,5-4 myń teńgege Jasybaıǵa aparýǵa daıyn.
Kólge jaqyn jerde (Jasybaı) jergilikti týrıstik aqparattyq ortalyq bar, onda ekskýrsııaǵa tapsyrys berýge bolady. Bir adamǵa shamamen 3 myń teńge alady. Jaıaý júrginshilerge arnalǵan 10-nan astam baǵdar uıymdastyrylǵan. Onyń ishinde Jasybaı kólinen Kempirtasqa deıin bólek jol bar. Qońyr Áýlıe úńgiri men Sultanmahmut Toraıǵyrov kesenesine aparatyn ekskýrsııa baǵdarlary da eskerilgen. Demalys úılerinde ekskýrsııa jóninde aldyn ala kelisýge bolady.
Baıanaýyldyń eń tanymal oryndardyń biri sanalatyn Kempirtas Jasybaı kólinen segiz shaqyrym jerde ornalasqan. Kóptegen ańyzdar Qońyr Áýlıe úńgirimen baılanysty. Bul aımaqta sileýsin, qasqyr, arqar mekendeıdi.
Qońyr Áýlıe úńgiri Toraıǵyr aýylynan on shaqyrym jerde tur. Buryn týrıster úńgirge soqpaq joldar men aǵash kópirler arqyly kóteriletin. Qazir ol jerde uzyndyǵy 920 metrge sozylǵan jańa baspaldaqtar salyndy.
Máshhúr Júsip kesenesi de Baıanaýyl aýdanynda ekeni belgili. Jaqyn jerde mýzeı jáne qonaqúı bar. Shaǵyn mýzeıde 170-ke jýyq eksponat, onyń ishinde ǵalymnyń jeke zattary jınalǵan. Sol jerdegi gıd týrısterge qazaq ádebıetiniń kórnekti ókili, aqyn, shejireshi, fılosof jaıynda jáne kesene tarıhy týraly egjeı-tegjeıli baıandap beredi.
Keseneden 73 baspaldaq tómen túsiredi, ıaǵnı Máshhúr Júsiptiń ómir súrgen jyldarymen sáıkes keltirilgen. Keseneniń basyna kóterilý qıyn emes, demalatyn oryndyqtar qoıylǵan.
Memleket jáne qoǵam qaıratkeri, aǵartýshy Musa Shormanovtyń kesenesi de Baıanaýyl aýdanynda. Bul nysan Teńdik aýylynyń mańynda 2018 jyly salyndy.
Atap aıtqanda, osy ekskýrsııalardan bólek, jaqynda Baıanaýylda oıyn-saýyqtyń jańa túri paıda boldy. Bul óńirdegi mańyzdy nysandardy bıikten tamashalaýǵa múmkindik bar. Týrısterge ulttyq park aýmaǵyn tolyq sholyp shyǵý úshin ushaqqa otyrýyna bolady. Cessna 206 ushaǵymen jarty saǵattyq saparǵa bir adamǵa 30 myń teńge tóıleıdi.
Óńirdegi jalǵyz taý shańǵysy kýrorty da Baıanaýyl aýdanynda Qarajar aýylyna jaqyn jerde ornalasqan. Qysta Baıanaýyldan Myrzashoqy taýynyń etegine deıin shaǵyn avtobýs qatynaıdy. Biraq ol jerge baratyndar kóbine óz kólikterimen keledi.
Taýdan shańǵymen jáne snoýbordpen syrǵanap túsýge bolady. Myrzashoqy taýyna uzyndyǵy 960 metr bolatyn arqan joly tartylǵan. Osy jolmen bir ret kóterilý quny 1000 teńge.
Jaqyn jerde demalys úıleri salynbaǵan. Ádette, týrıster aýdan ortalyǵyna baryp toqtaıdy. Jazda bul jerde shańǵy tebý múmkindigi bolmaıdy. Degenmen aýyl turǵyndarynyń biri Myrzashoqa mańynda jaıaý ekskýrsııa uıymdastyrmaqshy.
Budan bólek, Pavlodar oblysynda Sharbaqty aýdanyndaǵy shıpaly Maraldy tuzdy kólinde shomylýǵa jáne ádemi fotosessııa uıymdastyrýǵa bolady.
Maraldy kóli Pavlodardan 60 shaqyrym jerde ornalasqan. 27 mamyrdan bastap avtovokzaldan shaǵyn avtobýspen jetýge bolady. Avtobýs vokzaldan kólge qaraı saǵat 10-da, keri baǵytta saǵat 17:00-de shyǵady. Bılet quny eresekter úshin 2240 teńge, al balalarǵa 1120 teńge tóleý kerek. Demalys aımaǵyna kirýge aqy bólek tólenedi. Shıpajaıǵa kelý quny eresekterge 1000 teńge, balalarǵa - 500 teńge, alty jasqa deıin tegin. Munda 6 myń teńgege 10 adamǵa arnalǵan arnaıy oryndardy jalǵa alýǵa bolady.
Sharbaqty óńiri tek tuzdy kólimen ǵana emes, sonymen qatar qaraǵaıly ormanymen de tanymal.
Týrıster úshin oblys ortalyǵynda da tamashalaıtyn oryndar barshylyq. Qala turǵyndary ózen jaǵalaýynda kóp serýendeıdi, sebebi bul jer eń kórikti oryndardyń biri. Jaǵalaýdyń ortasynda qalanyń negizgi sahnasy ornalasqan. Jazda munda ár demalys saıyn kóp kórermen jınaıtyn ashyq aspan astyndaǵy kontsertter ótedi.
Pavlodar qonaqtary mindetti túrde mýzeılerge de barýy kerek. Olardyń biri - ǵımaraty XIX ǵasyrdyń aıaǵynda salynǵan tarıhı-ólketaný mýzeıi.
Osy kóne ǵımaratta birazdan beri Potanın atyndaǵy tarıhı-ólketaný mýzeıi ornalasqan Mýzeı qorynda biregeı eksponattar saqtaýly. Ondaǵy ekskýrsııa quny jaıynda aıtatyn bolsaq, eresekterge arnalǵan bılet 300 teńge, al balalar bıleti 150 teńge shamasynda.
Oblys ortalyǵynda taǵy bir biregeı murajaı bar. Bagaev atyndaǵy murajaı-úıi sáýlet eskertkishi retinde sanalady. Bul úıde 1905 jyldan beri belgili ólketanýshy, fotosýretshi Dmıtrıı Bagaev turyp, jumys istedi. Munda ol qaladaǵy alǵashqy fotosalondy ashqan. Mýzeıde sol kezeńde túsirilgen fotosýretter men kóne jádigerler saqtalǵan.
Pavlodardaǵy basty kórikti jerleriniń biri – Máshhúr Júsip atyndaǵy meshit. Aýmaǵy 48h48 metr. Segiz qyrly, 4 munarasy bar jáne olardyń árqaısysynyń bıiktigi 63 metrden. Kúmbeziniń bıiktigi (aıdy qosa alǵanda) 54 metrdi qurady.
Sonymen qatar, Pavlodardy aralap júrgende kórkemsýret mýzeıine nemese teatrǵa barýǵa bolady.
