Pavlodar oblysynda qatty jel turǵyn úıler men nysandardyń shatyrlaryn ushyryp áketti
PAVLODAR. QazAqparat – Ekpindep soqqan jel Alakól aýylyndaǵy feldsherlik-akýsherlik pýnktiniń, Petropavlovka aýylyndaǵy mekteptiń shatyryn ushyryp áketti, jeke turǵyn úılerdiń shatyrlary jartylaı zaqymdaldy, dep habarlaıdy QazAqparat tilshisi.
«21 shilde kúni saǵat 23:50-de Jelezın aýdanynyń Alakól aýylynda Lenın kóshesi 9 mekenjaıy boıynsha qatty jeldiń saldarynan («Qazgıdromet» RMK derekteri boıynsha ekpini 16 m/s-qa jetken) jalpy aýdany 187 sharshy metrde feldsherlik-akýsherlik pýnktiniń bir qabatty ǵımaratynyń shatyry buzylǵany týraly aqparat kelip túsken», - dep habarlady Pavlodar oblysy TJD baspasóz qyzmeti.
Sondaı-aq Petropavlovka aýylynyń Stepnaıa kóshesi 15 mekenjaıynda ornalasqan Býdenovka negizgi jalpy bilim beretin mektebinde 50 sharshy metr alańdaǵy ǵımarat shatyry ishinara buzylǵan.
«21 shilde kúni saǵat 19:00-de tótenshe jaǵdaılar jónindegi komıssııanyń jospardan tys jedel otyrysy ótti. Onda qolaısyz aýa raıy jaǵdaılarynyń saldarlaryn joıý, sondaı-aq zardap shekken ǵımarattar men qurylystardy qalpyna keltirý máseleleri qaraldy», - dep atap ótti vedomstvodan.
Jeke turǵyn úılerdiń shatyrlary jartylaı zaqymdalǵan. Qaza bolǵandar men zardap shekkender joq.
