Pavlodar oblysynda kásipkerler sany artty
NUR-SULTAN. QazAqparat – 1 qazandaǵy jaǵdaı boıynsha Pavlodar oblysynda tirkelgen zańdy tulǵalardyń sany 16043 birlikti qurady, dep habarlaıdy pavlodarnews.kz.
Oblystyq statıstıka departamentiniń baspasóz qyzmeti habarlaǵandaı, ótken jyldyń sáıkes merzimimen salystyrǵanda tirkelgen zańdy tulǵalardyń sany 3,4%, jumys isteıtinderdin sany 4% kóbeıdi.
«Mólsherligi boıynsha tirkelgen zańdy tulǵalardyń jalpy sanynan 98%-y shaǵyn, 1,5%-y orta jáne 0,5%-y iri kásiporyndardy quraıdy. Tirkelgen zańdy tulǵalardyń ishinen jeke menshik zańdy tulǵalar 87,9%-dy, memlekettik - 8,4%-dy, sheteldik - 3,7%-dy quraıdy. Uıymdyq – quqyqtyq nysandary boıynsha tirkelgen zańdy tulǵalar sany: memlekettik kásiporyndar – 359 (2,2%), sharýashylyq seriktestikter – 13191 (82,2%), aktsıonerlik qoǵamdar – 41 (0,3%) jáne basqa da uıymdastyrýshylyq quqyqtyq nysandary – 2452 (15,3%)», - dep habarlaıdy departament baspasóz qyzmeti.
Tirkelgen zańdy tulǵalardyń edáýir sany kóterme jáne bólshek saýdaǵa, avtomobılder men mototsıklderdi jóndeýge keledi, olardyń úlesi 33,3% qurady. Ekinshi orynda – qurylys (13,1%), úshinshi orynda – óńdeý ónerkásibi (7,6%). Osy úsh qyzmet túrleriniń jıyntyq úlesi barlyq tirkelgen zańdy tulǵalardyń 54%-yn quraıdy.