Pavlodar oblysynda kásipker aýylyndaǵy mektepte ІT-synyp ashpaq

ASTANA. QazAqparat - Pavlodar oblysyndaǵy Sharbaqty aýdanynda kásipker týǵan aýylyndaǵy mektepte ІT-synyp ashpaq. Bul týraly Astanada Nursultan Nazarbaevtyń qatysýymen ótip jatqan «Nur Otan» partııasy Saıası keńesiniń keńeıtilgen otyrysynda partııanyń Pavlodar oblystyq fılıaly tóraǵasynyń orynbasary Ilıa Terenchenko aıtyp berdi, dep habarlaıdy QazAqparat tilshisi.

«Biz oblysymyzda partııalyq jobalardyń barlyǵyn óńirimizdiń ekonomıkalyq keleshegin esepke ala otyryp ázirledik. Osy sebepti, respýblıkada birinshi bolyp partııalyq jobalardy iske asyrýdy qolǵa ala bastadyq. Solardyń ekeýine toqtala ketsem deımin. Búgingi tańda bizdiń Pavlodar qalasyndaǵy alǵashqy ІT-ortalyqta 20 adam bilim alyp jatyr. Osy ortalyqtyń alǵashqy túlekteri qaladaǵy kásiporyndarda eńbek etetin bolady», - deıdi ol.

Ilıa Terenchenkonyń aıtýynsha, qazirge deıin Pavlodar oblysy boıynsha 20 ІT-synyp ashylǵan.

«Búgingi tańda eń zamanaýı amerıkalyq ádis-amal arqyly qaladan 180 shaqyrym qashyqtyqta jatqan Jelezenko aýylynda balalar bilim alyp jatyr. Sol sekildi synyptar alystaǵy aýdandarda, Baıanaýylda, Maıda ashylýda. Osy 20 ІT-synyptardyń barlyǵyn da óz aýdandaryndaǵy baı-qýatty kásipkerler qoldap keledi. Kásipkerler óz tájirıbesimen bólisýge de daıyn. Máselen, «Pobeda» sharýa qojalyǵynyń basshysy Aleksandr Polıakov Sharbaqtydaǵy aýdan ortalyǵynda ashqannan keıin dál osyndaı ІT-synypty óziniń aýyly - Orlovkada ashýǵa bel sheship otyr», - dedi Ilıa Terenchenko.

Eske sala ketsek, Astanada búgin Qazaqstan Prezıdenti Nursultan Nazarbaevtyń qatysýymen «Nur Otan» partııasy Saıası keńesiniń keńeıtilgen otyrysy ótip jatyr. Shara barysynda «Nur Otan» partııasyn júıeli túrde jańǵyrtý boıynsha jumys barysy talqylanyp, Qazaqstan Prezıdentiniń bes áleýmettik bastamasyn júzege asyrý baǵytynda qoǵamdyq baqylaýdy uıymdastyrý máseleleri qaralýda.