Pavlodar oblysynda qarasan indetiniń paıda bolýyna maldardyń baqylaýsyz jaıylýy sebep bolǵan
ASTANA. Maýsymnyń 22-si. QazAqparat /Ernur Aqanbaı/ -Pavlodar oblysynda múıizdi iri qarada qarasan indetiniń paıda bolýyna Jolqudyq aýyldyq okrýginiń veterınarlyq dárigerine eskertpesten maldardy eldi mekennen tysqary jerlerde baqylaýsyz jaıý oqıǵasy sebep boldy.
Bul týraly búgin jýrnalısterge QR Aýyl sharýashylyǵy mınıstrligi Agroónerkásip keshenindegi Memlekettik ınspektsııa komıteti tóraǵasynyń orynbasary Ahmetjan Sultanov aıtty.
Onyń aıtýynsha, zerthanalyq zertteýlerdiń nátıjesi maldardyń qarasan indetimen aýyrǵanyn jáne odan keıin adamdarǵa juǵý faktisin rastaǵan. «Qazirgi kúni bizde saraptamanyń nátıjesi bar. Ol boıynsha buıryq daıyndaldy jáne Jolqudyq okrýgindegi Rebrovka men Qarakól aýyldarynan tysqary jerlerde qarasan indetiniń taralýyna jol bermeý úshin barlyq sharalar qabyldandy», dedi ol.
A. Sultanovtyń sózine qaraǵanda, Rebrovka aýylyndaǵy jeke sharýashylyqtyń qojaıyny Jolqudyq aýyldyq okrýginiń ákimine, veterınarlyq dárigerge eskertpesten, óziniń aýlasynda mal soıǵan jáne onyń etin eshqandaı ruqsat qaǵazynsyz Rebrovka jáne Qarakól eldi mekenderiniń turǵyndaryna taratqan. «Mal soıýǵa qatysqan jáne etti tamaqqa paıdalanǵan barlyǵy 80-ge jýyq adam dárigerlerdiń qadaǵalaýynda. Qazirgi kúngi aqparat boıynsha, kúıdirgi dıagnozymen aýrýhanaǵa jatqyzylǵan adamdardyń sany jeteý, onyń ekeýi kóz jumǵan», dedi ol.
Onyń aıtýynsha, qarasan aýrýy oqıǵasynyń shyǵýyna jergilikti atqarýshy organdardyń jumysyndaǵy kemshilikter de yqpal etken. «Eger atalmysh eldi mekenderde mal veterınarlyq ıspektorlardyń qadaǵalaýymen veterınarııa talaptaryna sáıkes soıylǵan bolsa, onda mundaı jaǵdaı oryn almaǵan bolar edi. Ádette, talap boıynsha mal veterınarlyq dárigerdiń qadaǵalaýymen soıylady, ıaǵnı maldy soımastan buryn jáne soıǵannan keıin medıtsınalyq tekserý júrgiziledi. Osyndaı qadaǵalaýdyń jáne qorytyndynyń negizinde veterınarlyq qujat beriledi. Atalmysh aýyldyq okrýgte bundaı jumys jolǵa qoıylǵanda, mundaı jaǵdaı bolmas edi. Pavlodar oblysy ákimdiginiń jáne Memlekettik ınspektsııa komıtetiniń kelisimi boıynsha, Jolqudyq okrýgindegi Alǵabas aýylynda mal soıatyn alańnyń qurylysyn salý josparlanǵan bolatyn. Alaıda, qazirgi ýaqytta mundaı alań salynǵan joq. Eń jaqyn mal soıatyn alań 50 shaqyrym jerdegi Aqsý qalasynda. Osy qıyndyqtar osyndaı aýyr saldarǵa ákelip otyr», dedi A. Sultanov.
Onyń aıtýynsha, Memlekettik ınspektsııa komıteti, Pavlodar oblysy ákimdigi jáne oblystyq veterınarııa qyzmeti qarasan indetiniń odan ári taralýyna jol bermeý úshin tıisti sharalar qabyldady. Jolqudyq aýyldyq okrýginiń aýmaǵynda jaıylǵan barlyq maldarǵa uıymdasqan túrde egý jumystary júrgizilgen jáne ol maldar jiti qadaǵalaýdy. Egý jumystary júrgizilgennen keıingi sońǵy eki kúnde indetpen aýyrýdyń qaıtalanýy nemese kúmán týǵyzatyn jaǵdaılar tirkelmegen. «Qarasan indetiniń shyǵýyna bir ǵana sebep bar: sıyrlar ólgen maldardyń qaldyqtary kómilgen óriste jaıylǵan. Ádette, mundaı aýrý topyraq arqyly juǵady. Qarasan indeti topyraqta 100 jáne odan da kóp jyl saqtalady. Mal aýrýyn tirkeý jónindegi kadastr boıynsha, Jolqudyq aýyldyq okrýginde sońǵy ret bul aýrý 1967 jyly tirkelgen. Árıne, ol aýmaqta osy indettiń oshaǵy bar. Qýańshylyq, aptap ystyq topyraqtan indettiń qozdyrǵyshyn syrtqy ortaǵy shaǵarýy múmkin. Qazirgi kúnde 5 mal osy indetten óldi, olar tolyǵymen alynyp, órteldi», dedi ol.
