Pavlodar oblysynda Qaraǵandyǵa bara jatqan shaǵyn avtobýs aıazda kúre jolda qalyp qoıǵan
PAVLODAR. QazAqparat – Pavlodarlyq polıtseıler qala syrtynda Óskemennen Qaraǵandyǵa jol júrip, aıazda kúre jolda turyp qalǵan avtobýstyń jolaýshylaryn qutqardy, dep habarlaıdy QazAqparat.
«Jolaýshylardyń qalaaralyq tasymalymen aınalysqan júrgizýshi 25 qańtarda serig in ertip, «Mercedes-Benz Sprinter» mıkroavtobýsymen Óskemennen Qaraǵandyǵa jol tartqan. Ókinishke qaraı, 40 gradýs aıazda tańǵy 05:00-te kóliktiń janarmaıy taýsylyp, saldarynan avtomobıl júrmeı qaldy. Tańǵy ýaqytta kómek suraıtyn eshkim tabylmady – kúre jolda ótip bara jatqan kólikter bolmaı, atalǵan ýchaskede uıaly baılanys ta jumys istemegen» dep baıandady oqıǵany Pavlodar oblystyq polıtsııa departamentiniń baspasóz qyzmetinen.
Tártip saqshylarynyń málimetinshe, ekeýi qatyp turǵan avtomobıldiń ishinde bir saǵattan astam ýaqyt otyryp, kómekten kúderin úzgen.
Osy ýaqytta joldy polıtsııa qyzmetkerleri patrýldep júrgen.
Olar Pavlodardan 80 shaqyrym jerde joldyń boıynsha turǵan kólikti baıqaıdy.
«Polıtseıler ekeýin jyly qyzmettik kólikke otyrǵyzdy, keıinirek kóligin qalaǵa deıin jetkizip, ary qaraı jol júrý úshin janarmaı satyp alýǵa kómektesken», - dep qosyp ótti oblystyq PD baspasóz qyzmetinen.
Júrgizýshiniń telefon nómirin jazyp alǵan polıtseıler onyń amandyǵyn bilý úshin ár saǵat saıyn baılanysqa shyǵyp turdy.
Keıin Pavlodar oblystyq polıtsııa departamentiniń bastyǵy Nurlan Másimovtiń atyna Óskemen turǵynynan alǵys kelip tústi.
Er adam aımaqtyń patrýl rotasynyń ınspektorlary Tilegen Syzdyqov pen Baǵdat Saýytovty qıyn jaǵdaıda kórsetken kómek úshin alǵysyn aıtty.
