Pavlodar oblysynda qar qursaýynan 392 kólik shyǵaryldy
PAVLODAR. QazAqparat – Qysqy maýsym bastalǵaly beri 21 avarııalyq-qutqarý jumystary kezinde jylytý pýnktterine 114 adam jetkizildi. Onyń jeteýi - kámeletke tolmaǵan bala, dep habarlaıdy pavlodarnews.kz.
Oblystyq TJD azamattyq qorǵanys basqarmasynyń aǵa ofıtseri Erlan Qasymovtyń aıtýynsha, qar qursaýynan qys bastalǵannan beri 392 tehnıka: 332 júk kóligi, 10 jolaýshylar avtobýsy, 50 jeńil avtokólik shyǵarylǵan. Eki jaǵdaıda basqa elderdiń, Qyrǵyz Respýblıkasynyń, Ózbekstannyń azamattary, sondaı-aq Reseı Federatsııasynyń aýmaǵyna jiberilgen úlken júk avtokólikteriniń júrgizýshileri men jolaýshylary zardap shekken. Osy keleńsiz jaǵdaıǵa tap bolǵandarǵa jedel jáne ýaqtyly medıtsınalyq kómek kórsetildi, tamaqtaný jáne túneý uıymdastyryldy.
Ádette, qys mezgilinde respýblıkalyq jáne oblystyq mańyzy bar avtojoldarda jylytý pýnktteri qandaı jerlerde ornalasatynyn qutqarýshylar men jergilikti atqarýshy organdar jylytý pýnktteri aldyn ala anyqtaıdy. Pavlodar óńirinde qysqy merzimde oblystyq jáne respýblıkalyq avtomobıl joldaryna shekaralas barlyq eldi mekenderde tótenshe jaǵdaıǵa tap bolǵan azamattarǵa arnalǵan jylytý pýnktteri jumys isteıdi. Júrgizýshiler men jolaýshylar jylytý pýnktterinde jylýmen, ystyq tamaqpen, aýyz sýmen jáne ystyq shaımen qamtamasyz etiledi. Sonymen qatar, pýnktterde ana men bala bólmesi, zardap shekkenderge dárigerge deıingi alǵashqy kómek kórsetetin medıtsınalyq pýnkt, uıaly telefondy zarıadtaý múmkindigi bar.
Eske sala keteıik, shuǵyl jaǵdaıda «112» nómiri boıynsha shuǵyl qońyraý shalý qajet. Bul telefon nómiri Qazaqstan boıynsha birdeı, sondyqtan tótenshe jaǵdaı bolǵan jerge qaramastan azamattar kómekke keledi.