Pavlodar oblysynda qant zaýyty salynbaq
PAVLODAR. QazAqparat - Pavlodar oblysynyń ákimi Jaǵalaýdyń jańa bóliginiń qurylysy men jańa onkodıspanserdiń qajet qurylǵylarmen jabdyqtalýy jóninde, sondaı-aq, pavlodarlyq fermerlerdiń qyzylshany ne sebepti ósire bastaǵany jóninde aıtty, dep habarlaıdy QazAqparat pavlodarnews.kz saıtyna silteme jasap.
Oblystyq máslıhat depýtattarynyń aldynda 2018 jyldyń birinshi jartyldyǵynyń qorytyndylary boıynsha esep bergen Bolat Baqaýov jýrnalısterge qosymsha suhbat berdi.
«Pavlodardaǵy jaǵalaýdyń uzaqtyǵy kelesi jyly jazda 6,2 shaqyrymǵa jetedi. Qazirgi tańda buryn «QazTransOıl» AQ-nyń ǵımaraty ornalasqan jerden temirjol kópirine deıin jóndeý jumystary júrgizilip jatyr », - dedi oblys ákimi.
Sondaı-aq, Bolat Baqaýov tilge tıek etken máselelerdiń biri - jańa onkologııalyq dıspanserdiń qurylysy boldy.
«Jobany túgeldeı júzege asyrý úshin respýblıkalyq bıýdjetten 12 mıllıard teńge suratatyn bolsaq, bizge eshkim ondaı somany bermes edi. Sondyqtan jobany eki kezeńge bóldik. Birinshiden, ǵımarattyń qurylysy júredi, artynan qajet qural-jabdyqtar satyp alynady », - dedi B. Baqaýov.
Sonymen qatar, jýrnalıster qaýymy aýyl sharýashylyǵy salasyndaǵy jobalarǵa qatysty suraqtar qoıdy. Belgili bolǵandaı, oblys ákimi óńirde qant zaýytyn ashý týraly ıdeıasyn áli de qoldaıtyn bolyp shyqty.
«Jeńiske aparar jol jeńil bolmaıdy. Іsti oıǵa alǵan soń júzege asyrý úshin biraz ýaqyt kerek ekenin túsinetin bolarsyzdar. Jobalaý ýaqytynyń ózi ǵana 1,5 jyldy talap etedi. Respýblıkada qantty óńdeýden kósh bastap kele jatqan Almaty oblysy bıyl qyzylshany 9 myń gektar jerde ósiredi. Al bizdiń «Pahar» sharýa qojalyǵynyń ózinde ǵana 9 myń gektar sýarmaly jer bar. Egis aınalymyn jaqsartý úshin qyzylsha ósirý isin bastaýǵa bolady. Biz qajet qural-jabdyqtardy, olardyń baǵasyn baqylap jatyrmyz. Qyzylshany jınap, saqtaýdyń amaldaryn jan-jaqty qarastyrý kerek», - dedi Bolat Baqaýov.
