Pavlodar oblysynda qalaaralyq jáne aýdanaralyq baǵytta jolaýshylardy tasymaldaý toqtatylady
Bul týraly Óńirlik kommýnıkatsııalar qyzmeti onlaın formatta ótkizgen baspasóz máslıhatynda Pavlodar oblysy sanıtarııalyq-epıdemıologııalyq baqylaý departamentiniń ókili Ǵızat Abeshev málim etti.
«Aqsý-Pavlodar baǵytyn qospaǵanda, oblys ishindegi qalaaralyq jáne aýdanaralyq avtobýs, shaǵyn avtobýs jolaýshylar tasymaly toqtatylady. Qoǵamdyq tamaqtaný oryndary tapsyrysty jetkizý nemese ózimen birge alyp ketý rejımine aýystyrylady. Saýda oryndary, taksıler men qoǵamdyq kólikterde sanıtarlyq dezınfektsııa kúsheıtiledi. Halyqqa qyzmet kórsetý ortalyqtary saǵat 9-dan 18.00-ge deıin aldyn ala jazylý arqyly qyzmet kórsetedi jáne senbi, jeksenbi, mereke kúnderi jumys kestesine tyıym salynady», - dep atap ótti Ǵızat Abeshev.
Departament ókiliniń aıtýynsha, mundaı shekteýler óńirdegi epıdemologııalyq jaǵdaıdyń nasharlaýyna jáne aýrý kórsetkishiniń artýyna baılanysty engizilip otyr.
«Búgingi tańda óńirde koronavırýs ınfektsııasyn juqtyrǵan 226 jaǵdaı tirkeldi. Onyń ishinde 172-si belgileri bar bolsa, 54-i belgileri joq. 12-si mektep oqýshysy men ekeýi - stýdent. Turǵyndar maska taǵý rejımin, áleýmettik qashyqtyqty saqtamaıdy. Munyń barlyǵy jappaı aýrýǵa ákeledi», - deıdi Ǵızat Abeshev.
