Pavlodar oblysynda hokkeıshiler mingen avtobýstar jolda qaldy
PAVLODAR. QazAqparat - Pavlodar - Sharbaqty kúre jolynda hokkeı komandalary mingen eki jolaýshylar avtobýsy qozǵalysyn toqtatty, dep habarlaıdy «QazAqparat» HAA tilshisi.
Pavlodar oblystyq TJD bergen málimetterge qaraǵanda, olar Soltústik Qazaqstannan Pavlodarǵa qaraı jolǵa shyqqan. Ol ekeýinen tys, Semeı - Pavlodar jáne Semeı - Óskemen qalaaralyq jolaýshy avtobýstary da sol jerde tur. Jalpy tórt avtobýsta 107 jolaýshy, sonyń ishinde balalar da bar. Olarǵa kómekke qum men tuz tıelgen alty arnaıy kólik jiberildi.
«Lebıaji aýdanynyń atqarýshy bılik organdary men TJD kúshteri aldymen hokkeı klýbtarynyń avtobýstaryndaǵy jolaýshylardy tasymaldaıdy. Avtobýstar ázirshe jolda tur. Jolaýshylar «GAZeldermen» tasymaldanady. Balalar hokkeı klýbynyń 15 sportshysy mingen alǵashqy topty áketip úlgerdik», - deıdi óńir TJD biryńǵaı aqparat qyzmetiniń basshysy Asqarbek Omarov.
