Pavlodar oblysynda halyqqa byltyrǵydan 9 ese kóp páter jalǵa beriledi

NUR-SULTAN. QazAqparat – Pavlodar oblysynyń ákimi Ábilqaıyr Sqaqov aımaqtaǵy halyqqa jyl sońynda jalpy kólemi 346 myń sharshy metr bolatyn baspana beriletinin málim etti, dep habarlaıdy QazAqparat tilshisi.

«Pavlodar oblysy turǵyndarynyń jaǵdaıyn jaqsartýǵa «Jumyspen qamtý jol kartasy» men ózge de memlekettik baǵdarlamalar edáýir yqpal etip tur. Bıyl 1 myń shaqyrym jol kúrdeli jóndelid. Onyń besten bir bóligi - buryn-sońdy asfalt bolmaǵan joldar. Sonymen qatar, 205 myń aýyl turǵyny taza aýyz sýmen qamtylady. Jańa salynyp nemese kúrdeli jóndeýden ótip jatqan áleýmettik nysannyń jalpy sany 200-ge jýyq», - dedi Ábilqaıyr Sqaqov OKQ-da ótken baspasóz máslıhatynda.

Ákimniń aıtýynsha mektepter men aýrýhanalardan ózge aýyldaǵy sport alańdary da jańartylyp jatyr.

«Al, jyl sońynda jalpy kólemi 346 myń sharshy metr bolatyn baspana tapsyrýdy josparlap otyrmyz. Onyń ishinde jalǵa beriletin páterler sany byltyrǵydan toǵyz ese kóp», - dedi ol.

Ábilqaıyr Sqaqov odan bólek óńirdegi óndiristik klasterdi damytýdyń bolashaǵy baryna senimdi. Máselen, alıýmınıı klasteri barǵan saıyn qalypqa túsip kele jatyr. Osy kúni shıkizattan avtokólik dóńgelegi shyǵarylyp kelse, jyldyń aıaǵynda radıator óndirisi bastalady. Mys klasteriniń de damý áleýeti joǵary. Tek Bozshakóldiń ózinde jylyna 100 myń tonnadan astam metall óndiriledi. Eki baǵytty da klasterlik damytý boıynsha jumys qyzý júrip jatyr.