Pavlodar oblysynda erli-zaıyptylar órttiń qurbany boldy
PAVLODAR. QazAqparat - Pavlodar qalasyna irgeles ornalasqan Temirjolshylar kentinde erli-zaıyptylar órtten kóz jumdy, dep habarlaıdy pavlodarnews.kz oblystyq TJD baspasóz qyzmetine silteme jasap.
Klenovaıa kóshesi, 110/1 mekenjaıy boıynsha eki páterlik bir qabatty tórt bólmeli úıde jıhazdar men tereze jaqtaýy, esik, kirpishten salynǵan qurylys janǵan. Qyzyl jalyn 70 sharshy metrdi sharpyp, tóbesi opyrylyp túsken. - Tilsiz jaýdy sóndirý barysynda 64 jáne 59 jastaǵy er adam men áıel adamnyń máıitteri tabyldy. Aldyn ala boljam boıynsha, qaıǵyly jaǵdaıdyń oryn alýyna elektr quraldaryn durys paıdalanbaý sebep bolǵan, - dedi departamentte.
Órt shyqqany týraly habarlama «112» nómirine saǵat 12.52-de túsken. Saǵat 03.21-de tolyǵymen sóndirilgen. Oqıǵa ornynda №34 jáne № 1 órt sóndirý bólimderinen jáne Ýsolka shaǵynaýdanynda jeke ornalasqan №2 órt sóndirý beketinen bes tehnıka men 15 adam jumys istedi. Budan basqa, aýrýhananyń qabyldaý bóliminiń kezekshisi tańǵy saǵat 05.25-te oblystyq balalar aýrýhanasyna búgin saǵat 4.25-te Lenın kentinen eki qyz balanyń jetkizilgeni týraly qońyraý shalǵan. «Túrli deńgeıde ysty gazben ýlaný» dıagnozy qoıylǵan eki qyz balanyń jasy 15-te. Qazirgi tańda olar somatıka bóliminde em qabyldaýda. Peshti durys qoldanbaý saldarynan jetkinshekter osyndaı jaǵdaıǵa tap bolǵan. - Sońǵy kezderi turǵyndar úıdi jylytý kezinde otyndy únemdeý maqsatynda peshtiń murjasyn erte jaýyp tastaıdy. Osyǵan baılanysty aldyn alý sharalary júrgizilgenine qaramastan, sońy qaıǵyly aıaqtalatyn jaǵdaılar jıilep otyr, - deıdi baspasóz qyzmetinde.
