Pavlodar oblysynda elik atqan brakoner ustaldy
PAVLODAR. QazAqparat - Reıd kezinde Aqtoǵaı aýdanynyń polıtseıleri «Aqtoǵaı-Sholaqsor» avtojolynda aqsýlyq turǵynnyń «Honda CR-V» avtokóligin toqtatty, dep habarlaıdy QazAqparat pavlodarnews.kz silteme jasap.
Pavlodar oblystyq polıtsııa departamenti baspasóz qyzmetiniń málimdeýinshe, kóliktiń salonynda eliktiń tutas eti, 10 keli balyq, tórt úırek pen ańshylyq qarýy bolǵan.
«Tekserý barysynda elikti atýǵa ruqsat qujaty joq ekeni anyqtaldy. Sonymen qatar ereje boıynsha elikti qoryqshyny ertip júrip qana aýlaýǵa ruqsat etiledi. Er adam zańsyz balyq aýlaǵan, sebebi bir adamǵa tek 5 keli ǵana balyq aýlaýǵa bolady. Zańsyz balyq aýlaý faktisine qatysty QR ÁQBK 383-baby boıynsha ákimshilik jaýapkershilikke tartylyp, 10 AEK kóleminde aıyppul salyndy», - deıdi departamentte.
Al elikti zańsyz atý boıynsha 52 jasar er adamǵa qatysty QR QK 337-babymen sotqa deıingi tergeý júrgizilýde.
Aıta keterligi, jyl basynan beri tabıǵat qorǵaý polıtseıleri óńirde 437 zańsyz ań aýlaý faktisin tirkegen. Tártip saqshylary ań aýlaý úshin qarýdyń qujattaryn, ańshylyq bıletin, ańnyń qaı túrin, qaı aýdanda aýlaýǵa ruqsat berilgeni kórsetilgen jol paraǵyn alyp júrý kerektigin eskertedi.
Sý qusy men elikti aýlaý maýsymy 2019 jyldyń 31 jeltoqsanyna deıin, terisi baǵaly ańdy aýlaý 2020 jyldyń 15 aqpanyna deıin jalǵasady.
