Pavlodar oblysynda eki kazıno jasyryn jumys istegen
PAVLODAR. QazAqparat - 2018 jylǵy segiz aıdyń qorytyndysy boıynsha ekonomıkalyq tergeý qyzmeti 134 qylmystyq isti aıaqtady. Onyń ishinde 42 qylmystyq is sotqa jiberilse, aqtalmaǵan negiz boıynsha 61 qylmystyq is toqtatylǵan, dep habarlaıdy pavlodarnews.kz.
Bul týraly óńirlik kommýnıkatsııalar qyzmetinde ótken baspasóz máslıhatynda Pavlodar oblysy boıynsha memlekettik kirister departamenti jedel-izdestirý qyzmeti basqarmasynyń basshysy Maksım Pahno málim etti.
«Kóleńkeli ekonomıkaǵa qarsy turý baǵytynda edáýir jumys júrgizilýde. Bıyl jasyryn jumys istegen eki kazıno anyqtaldy. Onyń biri totalızator jáne bıngomen baılanysty bolǵan. Jumys isteý úshin lıtsenzııa alǵan. Degenmen, ishinde shyn máninde kazıno jáne rýletka turǵan. Adamdar utys qoıǵan jáne býkmekerleri bolǵan. Ekinshisinde de dıller, rýletka bolǵan kazınonyń jumysyna tosqaýyl qoıyldy»,- deıdi Maksım Pahno. 
Vedomstvo usynǵan málimetke súıensek, aıaqtalǵan qylmystyq ister boıynsha memleketke 4,67 mlrd teńge zalal keltirilgen. Sonymen qatar 847,6 mln teńge somasyna tosqaýyl qoıylǵan. Munaı jáne munaı ónimderin zańsyz qaıta óndeý, tasymaldaý, satyp alý, satý, saqtaý boıynsha alty fakti, aqshany nemese basqa múlikti zańdastyrýdyń toǵyz faktisi, ulttyq jáne shetel valıýtasynyń shetelden qaıta oralmaýy boıynsha eki fakti, ekonomıkalyq kontrabanda jáne kedendik tólem men salyqtardy tóleýden jaltarýdyń bir, qasaqana jáne jalǵan bankrottaý boıynsha bir, salyq tóleýden jaltarý boıynsha 15, jumysty naqty oryndamaı shot-faktýralardy jazý boıynsha áreketterdi jasaýǵa qatysty 14 fakti, alkogol ónimin óndirý boıynsha jasyryn tsehtardy anyqtaý boıynsha tórt fakti tirkelgen.
