Pavlodar oblysynda egistikterge aramshóp qaýip tóndirip tur
PAVLODAR. QazAqparat - Pavlodar oblysynyń ákimdiginde kóktemgi-egistik jumystarynyń qorytyndylaryn shyǵardy, dep habarlady ákimdiktiń baspasóz qyzmetinen.
Bıylǵy jyly aımaqta egis alqaby kólemi 1,217 mln gektarǵa jetti, bul 2015 jylǵa qaraǵanda 72 myńǵa artyq. Bul rette 405 myń gektarda ylǵal men qordy saqtaıtyn tehnologııa engizilgen - bul astyq jáne maıly daqyldar egistikteriniń jartysyna jýyǵy. Alaıda, belgili bolǵandaı, derlik barlyq aýdandarda aramshópke baılanysty qıynshylyqtar bar. Aımaq basshysy egistik alqaptarynyń artýyn atap ótip, karantındik aramshóppen kúres júrgizýdi kúsheıtýdi tapsyrdy.
«Aýdandardy aralap shyǵyp, egistikterdiń kóbi aramshóp qorshap alǵan. Aýdan ákimderi bul ý kekire ekendigin aıtyp otyr», - dep atap ótti Bolat Baqaýov.
Pavlodar aýylsharýashylyǵy ǵylymı-zertteý ınstıtýtynyń ókilderi ý kekireniń taralýy barlyq jerde baıqalyp otyrǵanyn rastady. Búginde aramshóptiń bul túri Ekibastuz jáne Baıanaýyl aýdanynyń aýyldyq jerlerinde, sonymen qatar astyq egetin aýdandar - Ertis, Qashyr jáne Jelezın aýdandarynda qaýlap ketken.
AShM-niń oblystyq aýmaqtyq ınspektsııasynda respýblıkalyq bıýdjet esebinen aramshópke qarsy hımııalyq óńdeý jyl saıyn ótkiziletinine sendirdi. Alaıda oblys ákimi ókiletti mamandardyń kekire qaı aýdandardy basyp alǵanyn, sharýa qojalyqtary aramshóppen kúres úshin ne istep jatqanyn jáne jalpy alǵanda bul problemany sheshý úshin qandaı jumys atqarylyp otyrǵanyn anyqtaýyn talap etti.
