Pavlodar oblysynda depýtattyqqa 6 adam ótinish berdi

PAVLODAR. QazAqparat - Aldaǵy saılaýda Pavlodar oblysynda túrli deńgeıdegi máslıhattarǵa 189 depýtat jáne QR Parlamenti Májilisine bir depýtat saılanady, dep habarlaıdy Pavlodarnews.kz

Oblystyq aýmaqtyq saılaý komıssııasynyń tóraǵasy Gúlnar Amanjolovanyń málimetinshe, qazirgi ýaqytta kandıdattardy usyný protsesi júrgizilýde.

«Qazirgi tańda Pavlodar oblysynda Qazaqstan Respýblıkasy Parlamenti Májilisine – bir, qalalar men aýdandardyń máslıhattaryna 5 kandıdat usynyldy», – dedi Gúlnar Amanjolova.

Pavlodar oblysy boıynsha QR Parlamenti Májilisi men máslıhattar depýtattarynyń kezekten tys saılaýyn ázirleýge jáne ótkizýge 710 saılaý komıssııasy, onyń ishinde 14 aýmaqtyq, 173 aýdandyq jáne 523 ýchaskelik saılaý komıssııasy jumyldyrylǵan.

«Oblystyq máslıhatqa 32 depýtat saılanady, onyń ishinde 16 saılaý okrýgi majorıtarlyq júıe boıynsha, jartysy partııalyq tizim boıynsha saılanady. Úsh qala men 10 aýdanda 157 saılaý okrýginde depýtattar majorıtarlyq júıe boıynsha saılanady», – dedi spıker.

Spıkerdiń sózinshe, ózin-ózi usynýǵa kandıdat okrýgtik saılaý komıssııasyna ótinishin, ómirbaıanyn jáne jeke kýáliginiń kóshirmesin tapsyrýy tıis.

«Okrýgtik saılaý komıssııasy azamattyǵynyń bolýyn jáne ótelmegen sottylyǵynyń joqtyǵyn tekserý nátıjeleri boıynsha kandıdattyń zańnamada kózdelgen talaptarǵa sáıkestigi nemese sáıkes kelmeýi týraly sheshim qabyldaıdy», – dedi Gúlnar Amanjolova.

Kelesi kezeńge kandıdat máslıhat depýtattyǵyna kandıdattar úshin eń tómengi jalaqynyń 5 jáne Májilis depýtattyǵyna usynǵany úshin 15 eń tómengi jalaqy mólsherinde saılaý jarnasyn tólep, ózi jáne jubaıy úshin 2023 jylǵy 1 qańtardaǵy jaǵdaı boıynsha salyq deklaratsııasyn tapsyrýy tıis.
Aıta keteıik, atalǵan qujattardy tapsyrǵannan keıin okrýgtik komıssııa kandıdatty tirkeýdi júrgizedi.
Eske salaıyq, Májilis pen máslıhat depýtattyǵyna kandıdattardy tirkeý 2023 jylǵy 20 qańtarda bastalyp, 2023 jylǵy 18 aqpanda jergilikti ýaqyt boıynsha saǵat 18-de aıaqtalady.