Pavlodar oblysynda demalys kúnderi lokdaýn engizildi
NUR-SULTAN. QazAqparat – Pavlolar oblysynda demalys kúnderine lokdaýn engizildi. Bul týraly búgin Úkimet otyrysynda Pavlodar oblysynyń ákimi Ábilqaıyr Sqaqov aıtty, dep habarlaıdy QazAqparat tilshisi.
«Ótken aptada Pavlodar oblysynda koronavırýs ınfektsııanyń 616 jaǵdaıy tirkeldi. Aýrýdyń ósýi 5,8 paıyzdy qurap otyr. Ótken táýlikte 150 jaǵdaı tirkeldi. Baılanysta bolǵan 366 adam anyqtaldy. Epıdemıologııalyq zertteýler júrgizilip, jańa oshaqtar oqshaýlandy. Óńirdiń densaýlyq júıesi shtattyq rejımde jumys isteıdi. Infektsııalyq tósek-oryn júktemesi - 37,7 paıyz. Qazir 1 635 tósek-oryn, al rezervte taǵy da 2 myńnan astam oryn bar. Búginde reanımatsııada 21 naýqas jatyr. Olardyń úsheýiniń jaǵdaıy aýyr. Oblys boıynsha 169 mobıldi brıgada jumys isteıdi. Táýligine 2,5 myńnan astam PTR testileý júrgiziledi. Jaǵdaı baqylaýda», - dedi ol.
Oblys basshysynyń aıtýynsha, óńirdiń «qyzyl» aımaqqa kirýine baılanysty birqatar shekteý sharasy kúsheıtildi. Demalys kúni lokdaýn engizildi. Demalys kúnderi azyq-túlik jáne azyq-túlik emes jabyq bazarlardyń, saýda oıyn-saýyq ortalyqtarynyń, SPA, saýna, sport nysandarynyń jáne sport keshenderiniń, fıtnes ortalyqtarynyń qyzmeti, qoǵamdyq kólik qozǵalysy toqtatyldy. Qalaaralyq, aýdanaaralyq avtobýs, shaǵyn avtobýspen jolaýshylardy tasymaldaý shekteldi.
«Adamdar kóp jınalatyn oryndarǵa erekshe nazar aýdara otyryp, kúsheıtilgen rejımde 176 monıtorıngilik top jumys isteıdi. Barlyq medıtsınalyq, áleýmettik mekemeler tolyq oqshaýlaýnyp, syrttan kelgen barlyq baılanystardy boldyrmaý arqyly táýliktik rejımge kóshti. Juqtyrý oshaqtardy jedel oqshaýlaý, baılanysta bolǵan adamdardy baqylaý úshin kovıd-tik ınfektsııa jónindegi biryńǵaı aqparattyq taldaý ortalyǵy jumys isteıdi. Ortalyq barlyq mamandarmen qamtamasyz etilgen», - dedi Ábilqaıyr Sqaqov.
