Pavlodar oblysynda demalys kúnderi qoǵamdyq kólikter júretin boldy
PAVLODAR. QazAqparat – Pavlodar oblysynda demalys kúnderi qoǵamdyq kólikterdiń qozǵalysyna shekteý qoıylmaıtyn boldy, dep habarlaıdy Ravlodarnews.kz.
Alaıda óńirde COVID-19 ınfektsııasyna baılanysty epıdemıologııalyq jaǵdaı ýshyǵyp ketken kezde qaıtadan shekteý qoıylýy múmkin.
Bul týraly onlaın formatta ótken baspasóz máslıhatynda oblystyń bas sanıtarlyq dárigeri Batyrbek Álıev aıtty.
- Qaýlyǵa engizilgen birqatar ózgertýler men tolyqtyrýlarǵa sáıkes, 31 tamyzdan bastap qala jáne aýdanǵa qatynaıtyn jolaýshylar avtobýsy qyzmetine kiristi. Kitaphanalar men mýzeılerdiń de jumysyna ruqsat berildi. Biraq teatr, kontsert zaldary jáne kórme kórermenderdi qabyldaı almaıdy. Meshit, shirkeý syndy dinı nysandar da ashyldy. Mundaı oryndarda ujymdyq sharalardy ótkzýge tyıym salynǵan. Qyzmetin qaıta jandandyrǵandary sanıtarlyq talapty qatań saqtaýy tıis. Sondaı-aq qaýlyǵa engizilgen tolyqtyrýlarǵa sáıkes, basseınderdiń jumysyna ruqsat berildi. Biraq adamdar aldyn ala jazylýy tıis. Bir adamǵa keminde 5 sharshy metr aýmaq berilýi qajet. Jeke jáne toptyq jattyǵýlardy jasaýda sporttyq keshenderdiń qyzmeti de bastaldy. Memlekettik ulttyq tabıǵı parkterdiń, qoryqtardyń jumysyna da ruqsat berildi. Biraq kelýshilerdiń sany 15 adamnan aspaýy kerek, - dedi Batyrbek Álıev.
Óńirdiń bas sanıtarlyq dárigeriniń aıtýynsha, mektepterde bastaýysh synyptardyń oqýshylary ata-analarynyń ótinishi boıynsha kezekshilik synyptarǵa bara alady. Balalar sany 15-ten aspaýy kerek jáne barlyq sanıtarlyq talaptar saqtalýy tıis.
- Ázirge sporttyq, buqaralyq, otbasylyq, toılar, men mereıtoılyq, eske alý sharalaryn ótkizýge tyıym salynady. Úıde adam kóp jınalatyn sharalardy da ótkizýge bolmaıdy. Karaoke, kalıan, kompıýter, oıyn, boýlıng, túngi klýbtarǵa, qoǵamdyq monshalarǵa ruqsat berilmedi. Qalalar men aýdandardyń ishinde jolaýshylardy tasymaldaýǵa bolady. Qaýlydaǵy talaptardy saqtaı otyryp, erekshe bilim berýdi qajet etetin balalarǵa arnalǵan arnaıy, mamandandyrylǵan uıymdardyń, arnaıy mektep-ınternattardyń, jalpy tıptegi mektep-ınternattardyń, daryndy balalarǵa arnalǵan mektep-ınternattardyń da jumysy bastaldy, - dedi Batyrbek Álıev.
