Pavlodar oblysynda boryshkerler 7 mln teńge aıyppul tóledi
PAVLODAR. QazAqparat – Aımaq polıtsııasy 18 tamyzdan bastap ákimshilik aıyppul boryshkerlerine qatysty 313 materıal qozǵady, dep habarlaıdy QazAqparat.
«Oblys polıtseıleri aıyppul tólemegen boryshkerlerdi 7 mln astam teńge tóletti. Turǵylyqty meken-jaıy boıynsha aıyppul tólemegen 943 boryshker tekserildi. Qaryzyn ótemegen 8 adamnyń kóligi aıyppul turaǵyna qoıyldy, 313 ákimshilik materıal qozǵaldy», - dep baıandady Pavlodar oblystyq Polıtsııa departamenti basqarmasynyń bastyǵy Nurjan Tańatarov.
Vedomstvo baspasóz qyzmetiniń málimetinshe, polıtsııa 18 tamyzdan beri aımaqta «Boryshker» operatsııasyn júrgizip jatyr. N.Tańatarov sharanyń maqsaty – ákimshilik aıyppul tólemeı júrgenderdi anyqtaý jáne olarǵa qatysty sharalar ekenin qosyp ótti.
«Reıd sharalary tek joldarda emes, aıyppul tólemeıtinderdiń turǵylyqty meken-jaılary boıynsha da júrgizilýde», - dep habarlady Pavlodar oblystyq Polıtsııa departamenti ákimshilik polıtsııa basqarmasynyń bastyǵy.
Anton Gagarın
