Pavlodar oblysynda bıyl 70 sábıdiń ata-anasy vaktsınadan bas tartqan
ASTANA. QazAqparat - 2017 jyly úsh aıdyń ishinde Pavlodar oblysynda 70 sábıdiń ata-anasy vaktsına alýdan bas tartqan. Bul málimetterdi agenttiktiń joldaǵan resmı saýalyna bergen jaýabynda oblystyq densaýlyq saqtaý basqarmasynyń basshysy Nurlan Qasymov jarııa etti, dep habarlaıdy pavlodarnews.kz.
«Joǵaryda atalǵan azamattar bes jaǵdaıda (7,1%) dinı kózqarasyna, 46-sy (65,7%) jeke sebepterge baılanysty ekpe alýǵa kelisimin bermegen. Sondaı-aq 16 jaǵdaıda (25,7%) vaktsınaǵa senim bildirmese, úsh jaǵdaıda (4,2%) negatıvti pikir bildirgen. Kóbinese medıtsınalyq kórsetkishter boıynsha bir jyl tolǵanǵa deıin ekpeden ýaqytsha bas tartady. 2016 jyly 224 ekpeden bas tartý oqıǵasy tirkelingen. Onyń ishinde jeke sebepter boıynsha - 134 (66,7%) jaǵdaı, 35-i (15,8%) vaktsınaǵa senbeýden, 11 jaǵdaı (13,8%) dinı sebepterge baılanysty jáne 4 jaǵdaıda (1,8%) BAQ-tan keri aqparat alýy áser etken.
Vedomstvo usynǵan aqparatqa súıensek, QR Úkimetiniń 2009 jylǵy 30 jeltoqsandaǵy №2295 qaýlysyna sáıkes ázirlengen Ulttyq egý kúntizbesine sáıkes balalar týberkýlezge qarsy, V vırýstyq gepatıtine, kókjótel, dıfterııa, sirespe, gemofıldi juqpa, qyzylsha, qyzamyq, epıdemııalyq, pnevmokoktik, juqpaly parotıt, polımıelıt ekpelerin alady.
Aıta keterligi, 2017 jyly oblys boıynsha 0-den bastap 16 jas aralyǵynda ekpe alatyn balalardyń sany - 134 600. Óńirde byltyr jáne bıylǵy jyly vaktsınadan asqyný jaǵdaılary tirkelmegen.
