Pavlodar oblysynda bıyl 300 myń sharshy metr baspana salynady
ASTANA. QazAqparat - Pavlodarda turǵyn úı qurylysynyń qarqynyn arttyryp, 2018 jyly 300 myń sharshy metr baspana salý josparlanyp otyr, dep habarlaıdy pavlodarnews.kz.
Ótken jyly Pavlodar oblysynda 240 myń sharshy metrden astam turǵyn úı boı kótergen bolatyn. Bul 2016 jylmen salystyrǵanda 30 paıyzǵa artyq. Bul kórsetkish bıyl taǵy 1,5 esege óspek. Sol sebepti óńirdiń negizgi qurylys alańy - «Saryarqa» shaǵyn aýdanynda jumys bir sátke de toqtatylmaıdy.
«Qazir «Alıýmınıı qurylys» shaǵyn aýdanynan qonys aýdarǵandar úshin eki úı salynýda. Dál sol jerde nesıe jáne jaldaý jolymen beriletin alty kópqabatty úı boı kóteredi. «Pavlodar» áleýmettik-kásipkerlik korporatsııasy taǵy bir turǵyn úıdiń qurylysyn júrgizýde. Ekibastuzda birden jeti úıdiń qurylysy bastalyp ketti. Aqsýda bir kópqabatty úı turǵyzylsa, Qashyr aýdanynyń ortalyǵynda eki úı paıdalanýǵa berilmek. Buǵan qosa, qala quraýshy kásiporyndardyń esebinen bes úı boı kótermek. Onyń úsheýi Pavlodar qalasyna, qalǵan ekeýi Ekibastuz ben Aqsý qalasyna tıesili. Óńirde kommertsııalyq turǵyn úı qurylysymen aınalysatyndar da bar. Bul baǵytta kópqabatty tórt úı salynbaq», - deıdi Pavlodar oblysynyń qurylys basqarmasynda.
Sonymen qatar, 2018 jyly «Dostyq» shaǵyn aýdanynda ınjenerlik kommýnıkatsııalardyń qurylysy bastalady. Bul - elektr, sý jáne jylý júıeleri men baılanys. Negizgi magıstraldyq jáne ishki kvartaldyq jeliler 2018-2019 jyldary jasalady.
