Pavlodar oblysynda bir jyldyń ishinde jaıylym tapshylyǵy eki ese azaıǵan

PAVLODAR. QazAqparat – Pavlodar oblysynyń ákimi Asaıyn Baıhanov bir jyldyń ishinde óńirdegi jaıylym tapshylyǵy eki ese azaıǵanyn aıtty, dep habarlaıdy QazAqparat tilshisi.

«Aýyl sharýashylyǵy qarqyndy damyp keledi. Egis alqaby 1,6 mıllıon gektarǵa deıin ósti. Bul ótken maýsymǵa qaraǵanda 50 myń gektarǵa artty.

Sýarmaly jerdiń kólemi bıyl 9 myń gektarǵa ulǵaıady. Aınalymǵa 137 myń gektardan astam paıdalanylmaıtyn aýyl sharýashylyq jeri qaıtaryldy. Byltyrǵymen salystyrǵanda, aýyldardaǵy jaıylym tapshylyǵyn eki ese qysqarttyq», - dedi Asaıyn Baıhanov ortalyq kommýnıkatsııalar qyzmetinde ótken brıfıngide.

Sondaı-aq, ol oblysta «Aýyl Amanaty» jobasy aıasynda jeńildikpen nesıe berý bastalǵanyn málim etti.

«Jańa jumys ornyn quratyn 300-den astam joba qarastyryldy. 161 joba ıeleri kredıtterin alyp, kásipterine kiristi. «Aýyl – el besigi» jobasy boıynsha 35 myń turǵyny bar 26 aýyldyń ınfraqurylymyn jańartýyna kiristik. Aýyl ishindegi 89 shaqyrym joldy asfalttaý, 60-tan astam kósheni jaryqtandyrý, 22 áleýmettik nysandy salyp, jóndeý kózdelgen», - dedi ákim.