Pavlodar oblysynda bir jyldyń ishinde «112» jelisine 186 myń 321 ret qońyraý shalynǵan
ASTANA. QazAqparat - Bir jyldyń ishinde Pavlodar oblysynda shuǵyl kómek kórsetý sharalaryn qabyldaýdy talap etetin qaýip nemese basqadaı tótenshe jaǵdaılardyń týyndaýy týraly habarlamalardy qabyldaıtyn «112» biryńǵaı kezekshi-dıspetcherlik qyzmetine 186 myń 321 adam qońyraý shalǵan.
Bul kórsetkish ótken jylmen salystyrǵanda 79 myńǵa az, dep habarlaıdy pavlodarnews.kz.
Pavlodar qalasy TJD basqarmasy azamattyq qorǵanys tobynyń aǵa ofıtseri, maıor Qymbat Kópbaevtyń málimetinshe, negizgi qyzmet boıynsha 12 287, «101» jelisi boıynsha 549, «102» jelisi boıynsha 7 137, «103» jelisi boıynsha 4 409, aqparattyq- anyqtamalyq sıpatynda 68 705 jáne uıaly telefondardy tekserý jáne balalardyń oınaýy sııaqty 96 234 qońyraý tirkelgen.
Pavlodar qalasynyń tótenshe jaǵdaılar basqarmasy «112» qyzmeti tótenshe jaǵdaılarmen baılanysty adam ómiri men densaýlyǵyna, qorshaǵan ortaǵa qaýip tóngende ǵana kómek kórsetiletinin eskertedi. Aıta keterligi, «112» qyzmetine qatysy joq qońyraýlar soǵý jaǵdaılary jıelip ketken. QR Ákimshilik quqyq buzýshylyq týraly kodeksiniń 438-babyna sáıkes, arnaıy qyzmetterdi jalǵan shaqyrý úshin ákimshilik aıyppul salynady. Memlekettik órtke qarsy qyzmetin, polıtsııa organdaryn, jedel járdem, apattyq qyzmetterin jalǵan shaqyrǵany úshin jeke tulǵalarǵa 9 AEK kóleminde aıyppul qarastyrylǵan. Osy baptyń birinshi bóliminde qarastyrylǵan is-áreketter bir jyldyń ishinde ákimshilik jaza salynǵannan keıin qaıtalansa nemese apat, órt, zilzala apatty joıý kezinde bolsa jeke tulǵalarǵa 60 AEK kóleminde aıyppul qarastyrylǵan. Baptyń birinshi jáne ekinshi bóliminde sáıkes 14-15 jas aralyǵynda kámeletke tolmaǵan balalardyń jasaǵan is-áreketteri úshin eskertý jasalady nemese ata-analaryna jáne olardy almastyratyn tulǵalarǵa 15 AEK kóleminde aıyppul salý qarastyrylǵan.
