Pavlodar oblysynda bir otbasy tórt balany baýyryna basty
ASTANA. QazAqparat - Pavlodar oblysyndaǵy Jelezın aýdanynyń Joltaptyq aýylynda alǵashqy qabyldaýshy otbasy retinde Sergeı Drýzık jáne Nadejda Alekseevna Kachır balalar úıinen tórt balany qabyldady.
Oblystyq bilim berý basqarmasynyń málimetinshe, 9-15 jastaǵy Krıstına, Mılana, Kırıll jáne Aleksandr bul otbasynyń jańa músheleri atandy, dep habarlaıdy pavlodarnews.kz.
Nadejda Alekseevna Joltaptyq mektebinde orys tili men ádebıeti pániniń muǵalimi bolyp jumys istese, Sergeı Ivanovıch sharýa qojalyǵynyń basshysy. - Bizdiń balalar eresek jáne óz betterimen ómir súredi. Kópten beri balalar úıiniń jetkinshekterine otbasy jylýyn syılaýdy armandadyq jáne endi bizdiń maqsatymyz oryndaldy. Árıne, eseıgen balalardy tárbıeleýge alýǵa sheshim qabyldaý ońaı bolǵan joq, biraq bizdiń tájirıbemiz ben balalarǵa degen mahabbatymyz aldaǵy qıyndyqtardy jeńýge múmkindik beredi degen senimdemin, - deıdi Nadejda Drýzık. Balalar otbasy jaǵdaıyna birden úırenip ketti. Qyzdar analaryna as úıde qamqorshy bolsa, er balalar aýla jumystaryna kómektesedi. Bul otbasy eki balany tárbıelep jetkizgen. Búginde olar jeke shańyraq qurǵan. Pavlodar oblysynda jetim jáne ata-anasynyń qamqorlyǵynsyz qalǵan 508 bala otbasy meıirimine zárý.
Eske sala keteıik, 2017 jyldyń qańtar aıynan bastap qabyldaýshy otbasy týraly Ereje zańdy kúshine endi. Osy ózgeriske sáıkes qabyldaýshy tolyq otbasy bilim berý uıymdarynan jetim jáne ata-anasynyń qamqorlyǵynsyz qalǵan 4-10 balaǵa deıin tárbıeleýge ala alady.
