Pavlodar oblysynda bes iri sporttyq keshen salynady
ASTANA. QazAqparat - Pavlodar oblysynda turǵyndardyń mádenı-rýhanı damýyna serpin beretin «Ertis-Promenad» jobasy júzege asyrylmaq. Bul týraly óńir ákimi Bolat Baqaýov OQK ótken brıfınginde málim etti, dep habarlaıdy QazAqparat.
«Ertis-Promenad» jobasyn osy jyldyń maýsym-qazan aılary arasynda ár aptanyń juma, senbi, jeksenbi kúnderi júzege asyratyn bolamyz. Bul jobaǵa demeýshiler esebinen qazaqstandyq jáne shetel juldyzdary shaqyryp, ónerdiń túrli janrlary qamtylatyn bolady», - dep atap ótti Bolat Baqaýov.
Sondaı-aq, bıyl oblysta «Mýltımedııalyq-mýzeılik keshen» men 1200 orynǵa arnalǵan «Kontsert Holl» qurylysy, eki aýyldyq mekende Mádenıet oshaqtary men 5 iri sporttyq keshen salynady.
«Sonymen qatar, aýyldyq kitaphanalardy jańǵyrtyp, jańa zaman talabyna saı jabdyqtap, Kovorkıng-Ortalyqtaryn ashý boıynsha júıeli jumystar jasalýda. Qazaqstan tarıhy men mádenıeti týraly qysqametrajdy fılmderdi nasıhattap, elge tanytý maqsatynda, oblysta «Ertis Cinema» halyqaralyq kınofestıvalin ótkizý josparda bar. Búginde alys-jaqyn shetelderden osy kınofestıvalǵa qatysý úshin 40-tan astam ótinish tústi», - dedi Bolat Baqaýov.
«Jahandaǵy zamanaýı qazaqstandyq mádenıet» arnaıy jobasy boıynsha elimizdiń mádenıetin shetelge tanytyp, nasıhattaýda oblystyń Isa Baızaqov atyndaǵy fılormonııanyń sımfonııalyq orkestri Italııa eliniń 7 qalasynda bolyp, 22 kontsert bergen.
«Josparda óner ujymdarynyń Birikken Arab Ámirlikteri elderine gastrolderi josparlanýda. Sonymen qosa, oblysymyzdyń Júsipbek Aımaýytov atyndaǵy drama teatrymyz Egıpet eliniń Kaır qalasyna gastroldik saparmen barǵaly jatyr», - dedi oblys ákimi.
