Pavlodar oblysynda bas dárigerlerdiń kabınetteri birinshi qabatqa kóshiriledi
PAVLODAR. QazAqparat - Pavlodar oblysynda medıtsınalyq mekemeler basshylarynyń kabınetteri birinshi qabatqa kóshiriledi. Bul týraly oblystyq Densaýlyq saqtaý basqarmasy basshysynyń orynbasary Erlan Erjanov málim etti, dep habarlaıdy QazAqparat.
Ravlodarnews.kz saıtynyń jazýynsha, QR Memlekettik qyzmet isteri jáne sybaılas jemqorlyqqa qarsy is-qımyl agenttigi Pavlodar oblysy boıynsha departamentiniń «Ertis - adaldyq alańy» jobalyq ofısinde brıfıng ótti. Onda turǵyndarǵa qolaıly jaǵdaı jasaý jáne medıtsına salasyndaǵy ashyqtyqty qamtamasyz etý máseleleri aıtyldy.
«Ótken jyly medıtsınalyq uıymdarda naýqastardy qoldaý qyzmeti kabınetterin birinshi qabatqa kóshirý sheshimi qabyldanǵany belgili. Medıtsınalyq uıymdarda basshylardyń kabınetteri tehnıkalyq múmkindik bolǵan jaǵdaıda birinshi qabatqa aýystyrylady. Bıyl qańtar aıy boıy bizdiń vedomstvonyń basshysy Oraz Muqashev Halyqqa qyzmet kórsetý ortalyqtarynda aı saıyn eki ret, senbi kúnderi ashyq kezdesýler ótkizedi. Sol jerge kelgen kez kelgen turǵyn ózderin tolǵandyrǵan saýalǵa birden jaýap ala alady. Mundaı sharalar máseleni ýaqytynda sheshýge kómektesedi», - dedi Erlan Erjanov.
Spıker 2019 jyldyń basynan Densaýlyq saqtaý basqarmasy birqatar baǵynysty medıtsınalyq uıymdarda satyp alýdy ortalyqtandyrýdy júrgizgenin jáne bul tájirıbe aldaǵy ýaqytta jalǵasyn tabatynyn atap ótti.
«Budan basqa, memlekettik-jekemenshik áriptestik aıasynda statsıonarlyq qyzmet kórsetetin 11 mekemede tamaqtaný qyzmeti ortalyqtandyrylady. Munyń barlyǵy qyzmet kórsetý sapasyn arttyra túspek», - dedi basqarma basshysynyń orynbasary.
Sondaı-aq QR Memlekettik qyzmet isteri jáne sybaılas jemqorlyqqa qarsy is-qımyl agenttigi Pavlodar oblysy boıynsha departamenti basshysynyń orynbasary Nurlan Jahın 31 qańtar kúni Facebook-te tikeleı efırde ótken brıfıng aldaǵy ýaqytta dástúrge aınalatynyn aıtty.
«Elbasynyń tapsyrmasyna sáıkes «Ertis - adaldyq alańy» jobasy aıasynda turmystyq sybaılas jemqorlyqtyń aldyn alý jáne qoǵamdyq baqylaýdy kúsheıtý maqsatynda úsh blok boıynsha jumys atqarylady. Mundaı formatta uıymdastyrý erkin alańda ózekti máselelerdi kóterýge múmkindik beredi. Birinshi kezeńde áleýmet úshin asa mańyzdy bolyp tabylatyn densaýlyq saqtaý salasy qamtylyp otyr. Eki kún buryn densaýlyq saqtaý salasy taqyrybynda brıfıng ótetini týraly habarlama berilgen bolatyn. Nátıjesinde Facebook áleýmettik jelisi arqyly 15 suraq kelip tústi», - deıdi Nurlan Jahın.
