Pavlodar oblysynda balyqtyń neden qyrylǵany belgili boldy

PAVLODAR. QazAqparat - Pavlodar oblysynyń Tıapka kólinde balyqtyń qyrylýyna baılanysty sýdan synama alyndy, dep habarlaıdy QazAqparat.

Eske sala keteıik, buǵan deıin Tıapka kólinde balyq jappaı qyrylǵanyn habarlaǵan bolatynbyz.

Keshe Pavlodar oblysy boıynsha balyq ınspektsııa bólimi, Pavlodar oblysynyń ekologııa departamenti, Pavlodar oblysynyń jer qoınaýyn paıdalaný, qorshaǵan orta jáne sý resýrstary basqarmasy men «Balyq sharýashylyǵy ǴÓO» JShS Altaı fılıalynyń ókilderi Tıapka kóline barǵan.

Ekologııa departamentiniń mamandary zerthanada zertteý júrgizý úshin sý synamasyn aldy.

«Balyqtardyń qyrylýynyń sebebi - aldyn ala boljam boıynsha Tıapka kóliniń taıaz bóligin tolyq muz basýy. Tıapka kólinde balyqtyń qyrylýynyń naqty sebebin Pavlodar oblysy ekologııa departamentiniń zerthanalyq saraptama qorytyndysy anyqtaıdy jáne qosymsha habarlanady» dep málim etti Zaısan-Ertis oblysaralyq basseındik balyq sharýashylyǵy ınspektsııasy.

Óli balyqtar jınalyp, kózi joıyldy. Bul jumysqa 17 adam qatysty.

Qyrylǵan balyqtyń kólemi - 80 kg (móńke balyq, onyń shabaqtary – 63 kg, sazan – 14 kg jáne shortan – 3 kg).

Sý aıdyny Pavlodar oblysy Aqsý qalasynyń aýyldyq aımaǵynda ornalasqan, janynda óndiristik obektiler joq. Pavlodar qalasynan 25 km jerde.

Aýdany - shamamen 40 ga, tereńdigi - 1,1 m. Rezerv sý aıdyny sanalady.