Pavlodar oblysynda balalardy qutqarǵan polıtseı esin jıdy
PAVLODAR. QazAqparat - №1 Pavlodar qalalyq aýrýhanasynda áriptesimen birge kúre jol ústinde balalar toly avtobýsty KamAz-ben soqtyǵysýdan saqtap qalǵan polıtseıdiń densaýlyq jaǵdaıy týraly aıtyp berdi, dep habarlaıdy «QazAqparat» HAA tilshisi.
Jýrnalısterge №1 Pavlodar qalalyq aýrýhanasynyń bas dárigeri Sovethan Smakov málimdegendeı, Murat Nurseıitovke aýrýhanaǵa túsken alǵashqy saǵattardan bastap emdeý sharalary júrgizilgen. Aýrýhana Astanadaǵy áriptesterimen kún saıyn baılanysyp otyrady.
«Maıly embolııa dep atalatyn asqynýdyń aldyn alý boıynsha júrgizilgen em-domdarymyzǵa qaramastan, Murattyń jaǵdaıy úshinshi táýlikte kúrt nasharlap, ókinishke qaraı, ony ókpeniń jasandy ventılıatsııasy apparatyna qostyq. Biz ony dúısenbi kúni Astanaǵa jiberýdi josparlap edik, - dep málimdedi S. Smakov. - Alaıda, aýa raıy ushyp shyǵýǵa múmkindik bermedi. Biraq, oǵan qaramastan Astanadaǵy áriptester keshkisin ózderi ushyp keldi. Al, biz oǵan deıin oblystyq mamandardyń qatysýymen óz deńgeıimizde konsılıým ótkizdik. Konsılıýmdy Astanadaǵy polıjaraqat ortalyǵymen telekópir arqyly ótkizdik. Astanalyq dárigerler kelgende Murat apparatta boldy. Osyndaı asa aýyr jaraqat alyp, asqynǵan naýqastardy ornynan qozǵaýǵa bolmaıdy. Sondyqtan, respýblıkalyq áriptesterimizben aqyldasa kele, ony elordaǵa jibermeıtin bolyp sheshtik. Allaǵa shúkir, bul ádis ońtaıly sheshim bolyp shyqty. Qazirgi tańda jasandy tynystandyrý qurylǵysyn alyp tastadyq. Ol esin jıdy. Onyń ómirine qaýip tóndirgen asqynýlar artta qaldy».
Sovethan Smakovtyń aıtýynsha, búginde Pavlodar qalalyq aýrýhanasynyń dárigerleri elordalyq áriptesterimen kezekti telekópirdi josparlaýda. Keıin olar Murat Nurseıitovti Astanaǵa jetkizetin yńǵaıly kúndi belgilep, sanavıatsııamen alyp ketedi.
