Pavlodar oblysynda balabaqshaǵa «Asyq terapııasy» engizildi
PAVLODAR. QazAqparat - Pavlodar oblysyndaǵy balabaqshalardyń birine «Asyq terapııasy» engizildi, dep habarlaıdy QazAqparat pavlodarnews.kz saıtyna silteme jasap.
«Asyq terapııasy» Aqqýly aýdanynyń ortalyǵyndaǵy «Aınalaıyn» balabaqshasynda qoldanyla bastady. Jobanyń avtory - mekeme tárbıeshileri Merýert Áýbákirova men Gúlden Saǵalova.
«Asyq terapııasy» aýdan boıynsha alǵash ret bizdiń balabaqshada 2018 jyldyń qyrkúıek aıynda engizildi. Bul baǵdarlama týraly ınternet arqyly bilgen edik. Budan keıin ózimiz tolyqtyryp, qosymsha arqan tartý, qyzý qýý, taqııa tastamaq sııaqty ulttyq oıyndardyń barlyq túrin qamtydyq. Buǵan deıin balalar doıbyny shólmekterdiń qaqpalarymen oınaıtyn. Endi onyń ornyna asyqtardy paıdalanamyz», - deıdi Merýert Áýbákirova.
Tárbıeshiniń aıtýynsha, ekologııalyq turǵydan taza sanalatyn asyq balǵyndardy shapshańdyq pen eptilikke, mergendikke, qol býyndarynyń ıkemdi bolýyna baýlıdy. Mektepke deıingi mekemede 200-den astam asyq ata-analardyń kómegimen jınalǵan. Tórt topta 3-5 jas aralyǵynda barlyǵy 100 bala tálim-tárbıe alady. Kóbinese asyq oıyny dene shynyqtyrý jáne matametıka sabaqtarynda qoldanylady.
Varıatıvti komponent retinde aptasyna eki ret - sársenbi jáne juma kúnderi ulttyq buryshta túrli oıyndar ótkiziledi.
«Bul oıynda bala toppen jumys isteýdi úırenedi, tústerdi ajyrata biledi. Tildi damytýda mańyzdy oryn alady. «Hantalapaı», «Úsh taban», «Sheńber» sııaqty túrli asyq oıyndary týraly aıtamyz. Tipti, asyq sanamaqtyń rólin de atqarady», - deıdi Merýert Áýbákirova.
Oblystyq bilim berý basqarmasy usynǵan málimetke súıensek, óńirde 172 asyq atý sektsııasyna barlyǵy 3 myńǵa jýyq oqýshy qatysady. Eske sala keteıik, Aqsý qalasyna qarasty Mámáıit Omarov aýylyndaǵy Jambyl orta mektebiniń oqýshysy Beıbarys Shuǵyla asyqtan massajer, sanamaq, tús ajyratqysh, tastary súıekten jasalǵan doıby, asyq atýǵa arnalǵan qural qurastyrǵan.
