Pavlodar oblysynda balabaqsha esepshisi 14 mln teńgeni jymqyrdy
«Pavlodar oblysy boıynsha ishki memlekettik aýdıt departamenti Aqsý qalasyndaǵy balabaqshalardyń birinde jumys isteıtin esepshiniń bıýdjet qarajatyn urlaý faktisin anyqtady», - dep habarlady Pavlodar oblysy ishki memlekettik aýdıt departamenti qarjylyq esep aýdıti bóliminiń bas mamany Qýanysh Iseev.
Departament bóliminiń basshysy Anar Muratovanyń málimetinshe, aýdıt ótinish negizinde ótkizilgen.
«Aýdıt kezinde kásiporyn esepshisiniń uıymǵa azyq-túlik jetkizýshilermen esep aıyrysýǵa jáne qyzmetkerlerge jalaqy tóleýge arnalǵan qarajatty óziniń jáne týysynyń bank kartochkalaryna negizsiz aýdarǵany belgili boldy», - dep atap ótti Q.Iseev.
Esepshiniń 2020 jyly urlaǵan bıýdjet qarajatynyń jalpy somasy 14 mıllıonǵa jýyq teńgeni qurady.
Aýdıt materıaldary protsessýaldyq sheshim qabyldaý úshin Pavlodar oblysy boıynsha ekonomıkalyq tergeý departamentine jiberildi.